Bawrhsap thar in Serchhip District-a MJA member te kawmin inpawh taka thawhpui-ah a sawm

Serchhip District Bawrhsap thar, Kumar Abhishek, IAS chuan nimin khan Serchhip District MJA Member te chu a Pisa-a leng-ah sawmin inkawmna an nei a, MJA member te chu Serchhip District tana hmalakna hrang hrangah inpawh taka thawhpuiah a sawm.

Serchhip District Bawrhsap Pisa-a an inkawmna ah hian District Bawrhsap, Kumar Abhishek chuan, kum 2018 October thla atanga Mizorama a awm tawh thu sawiin, ram ralmuang, mipui inpawhtlang leh boruak nuam tak nia a hriat thu a sawi a. Serchhip District chu ram lailia awm, ziak leh chhiar thiam tamna District, faina kawnga hmala tha a nih avanga a ngainat nghal thu a sawi a. Hun remchang a awm phawt chuan a theih anga tam District chhunga khuate tlawh a duh thu a sawi a. Mamit District-a a awm laia a lo tih tawh, 'In khuaah sawrkar' tih programme pawh a theih chuan Serchhip District-ah kalpui ve leh ngei a rilruk thu sawiin, he ruahmanna a lo kalpui tawh dan chuan sawrkar Official ten a ruala thingtlang khuate tlawhin mipuite mamawh an tihsak theih ang chi apiang an va tihsak thin a ni.

He hunah hian Serchhip MJA President, Kapliana Pachuau chuan Bawrhsap thar chu chanchinbumi ten an lo lawm tih sawiin, kawng engkimah thawhpui an inhuam thu leh a tul a nih phawt chuan chanchinbumite chu thurawn pe-a, kaihhruai an ngaihna ah engmah hrilh hreh lo turin a ngen a. MJA member dangte pawhin Bawrhsap hnenah hian an ngaih pawimawh zawng leh tha nia an hriat te an sawi ve bawk.

Bawrhsap thar hi Serchhip DIPRO, K. Saitluanga MIS chuan tawiawmin Serchhip District-a Media dinhmun tlangpui a sawi a, Serchhip khawchhungah Daily Newspapers pasarih leh Cable TV pathum awmin MJA members 10 an awm a, MJA members hi Thenzawl-ah 2 leh N. Vanlaiphai-ah pakhat awmin Serchhip District-a MJA Member hi an vaiin mi 13 an ni.