Leimin vangin Serchhip Vengchung-ah chenna In pakhat chhia

Nimin zing dar 10:30 vel khan Serchhip Vengchung-a Lawmkima te chenna In chu an In bul-a Retaining Wall chim in an In ban thenkhat a hnawl avangin luahzui tlakloh in a chhia a, nimin vek khan In chhelai hi thiah nghal a ni.
He In hi Saron Veng chunglam-a awm niin chhungkaw member 8 chenna a ni a, a ruhrel RCC niin Assam Type-a sak chhunzawm a ni a, Housing for All (PMAY) hmanga sak niin In neitute hian nikum December thla khan an luah tan a ni. He In bulah hian Serchhip-I VC te chuan ft. 24 vela sei Retaining Wall siamin lei an chhunkhah hnuah Motor in herna hmun atan hman a ni a, Retaining Wall bulah hian PHE Department in Serchhip Vengchung atanga Saron Veng tui an pekna line kaltlangin kawng bul chiah ah hian Valve vuah niin helai hmun atang hian Tui a put deuhreng tih In neitute hian an sawi a, tunhnaiah ruah a sur avangin helai-ah hian tuihawk a luan belh bawk avangin a che deuh nia hriat a ni a, nimin zing khan Serchhip-I VC te pawh hian a hmunah enfiahin an haw hnu lawkah Retaining Wall hi chimin a thlanglam-a In ban pahnih chu a hnawl ta nia hriat a ni.
Vanduaina thlen lai hian In neitute an awmloh avangin mihring thi leh hliam an awm lova, In ban pahnih a hnawl avang hian In zatve vel, Choka leh Mutna pindan atana an hman chu luahzui tlakloh in a chhe vek a, helai hmuna bungrua awm te pawh In chim hian a chimpui vek a ni. Vanduaina a thlen thu hriat a nih veleh hian mi tlawmngai te pungkhawm nghalin In chhia in a chimpui bungrua te senghawi a nih bakah In chhe chin hi thiah nghal a ni a, vanduaina tawk te tana In sak leh chungchangah erawh engmah ruahmanna an la neihloh thu Serchhip-I VC te chuan sawiin, In zatve hi luah theih leh tura siam mai theih niin a lang.
Vanduaina thlenna hmun hi nimin vek khan Serchhip DC Office atangin SDC, Denny Lalchhuanawma chuan tlawh nghalin thil thlen dan a en nghal a, sawrkar atanga tanpuina awm thei ang te ngaihtuah a nih tur thu a sawi bawk. Serchhip bialtu MLA, Lalduhoma pawhin vanduaina tawkte tan hian Silpauline 2 leh Rs. 2000/- chu ZPM Serchhip Block kaltlangin a pe nghal a ni.

Comments

Chhiar Hlawhte