Chanchin thar thenkhat :

MZU leh College la khar dawn

Higher & Technical Education Minister, Dr. R. Lalthangliana chuan an Department hnuaia College leh zirna In hrang hrang bakah Mizoram University te chu sawrkar laipui thu angin khar chhunzawm ala ni zel dawn, a ti. Higher & Technical Education Minister hian Mizoram-a zirna In sang, Higher & Technical Education Department hnuaia mite leh MZU te chu Sawrkar Laipui Unlock-2 inkaihhruaina ah July ni 31, 2020 thleng zirna In zawng zawng hawn khap a nih avangin khar chhunzawm a la ni dawn tih Inrinni khan a sawi a, Sawrkar laipui thu leh hla ngaichang chung zelin heng zirna In hrang hrang hawn theih hun tur hi ruahman a la ni ang, a ti bawk. Hemi hma hian Minister hova Higher and Technical Education hotute thukhawm chuan Vawiin, July ni 13 atanga College zawng zawng hawng tan turin thutlukna an lo siam tawh a ni.

Uluk zawkin lirthei enfiah
Hri leng mek karah mamawh phurtu lirtheite kawng lakah tangkhang lova an thlenna tur lamah an tlan tlang zar zar theihna tura Supreme Court in thupek a siam remchangah hmanga bungraw kara Zu phurlut an awm thin nia sawi a awm avangin Kolasib-a Excise & Narcotics Department chuan uluk zawkin lirthei endik hna an kalpui a. Hetianga Supreme Court in thupek a siam avang hian END Kolasib chuan Lailapur hnaiha Temporary Check Post an siam pawh heng lirtheite enfiahna atan hian remchang lova an hriat avangin uluk zawka lirthei enfiah a nih theihnan Department Check Gate lamah tunhnai khan an insawntir a ni bawk.

Hmunhlui nia hriat enfiah
Khuangthing Students` Union (KSU) chuan Inrinni khan Khuangthing khaw ramchhunga pi pu hmun hlui ni ngeia hriat chu a hmunah kalin, belhchianna a nei a. He hmun hi Khuangthing atanga KM 4 vela hla a awm niin, Bangla mual-a awm a ni. Helai hmunah hian Lungdawh awmin Lung hi chhinchhiah theih 79 awmin, engemaw zat chu bothlau tawh a ngaih a ni.

Party in In chung tur pe
Mamit Lungsir Veng MNF Unit leh Mamit Bazar Veng MNF Unit te chuan an Unit huam-chhunga Inchung thawmthat ngai leh Inchung tur Rangva neilo chhungkaw pahnih ve ve te tan rangva an ngaihtuah sak a, hêng rangva te hi MNF Unit pahnih te aiawhin Inrinni zing khan Mamit Bialtu MLA, Er. H. Lalzirliana chuan a hlan a ni.

Zemabawk-ah In 1 chim
Nimin chhun dar 11:30 vel khan Zema-bawk Kananthar Veng-a Zokailiana Hnamte te chenna In, Assam Type chu a chhak lam leimin vangin a tlu a, mihring thi leh hliam an awmlo. He In chhaklam hi a hma pawhin a lo che deuh tawh a, hei vang hian Inrinni khan bungrua hi an lo thiarchhuak hman a ni.

Comments

Chhiar Hlawhte