Rate bithliah zawmlo te Rs. 500 theuh chawitir

Serchhip Bazar-a Sa man bithliah zawm loh avanga Inrinni kaltaa Sarep zuartu mi 5 man tak te chu Rs. 500/- theuh chawitira hrem an ni.

Serchhip-a Legal Metrology Department hotute hnen atanga thu kan dawn danin tunhnaia Ser-chhip District Bawrhsap hova Meeting in Serchhip Bazar-a Sa man tur an bithliah zawmlo te hi Inrinni khan enfiah niin Sarep zuartu mi 5 te chu man niin nimin khan Office-ah inlan tura koh an ni a, Sec 10 of LM Act 2009 bawhchhiat vangin Rs. 500/- theuh chawitir-a hrem an ni a, Bawngsa zuartute erawh a then in an lo hralh zawh hman avangin pawisa chawitir lovin rate hi zawm tawh tura hriattir an ni a, an zawmlo zui zel a nih chuan man leh an nih tur thu thuneitute chuan an sawi bawk.

Heng Sarep zuartute hian nimin vek khan Addl. DC, HD. Lalpekmawia chu hmuin an harsatna hrang hrang te thlenin Sa rep man bithliah chungchang hi an sawipui a, Addl. DC chuan karleh ah Meeting kovin an harsatna te hi sawiho a nih leh tur thu alo hrilh a. Sarep zuartute chuan tunhnaia Meeting in gram 750 tling ngei Rs. 350/- a zuar tura an tih chu an tan zawm theih ngaihna a awmloh thu an sawi a ni.

Hetihlai hian Serchhip Bazar-a Arsa zuartute chuan tunhnaia Bawrhsap hova thu-khawm in an rel angin nimin atang khan Ar puahsa chu Kg. ah Rs. 300/- in an zuar tan tih an sawi a, amaherawh chu tunhnaiah Serchhip-a Ar lei tur a van avang leh a awmchhun te pawh District dang atanga man to zawka rawn zawng te an awm ve zel avangin Ar lak tur hmuh zawhloh mai an hlauh thu an sawi a, tuna rate thar an hman ang hian engtianga rei nge an zawrh theih dawn an hriatloh thu an sawi bawk. Serchhip Bawrh-sap hova thukhawm in Vawksa rate an siam erawh niin thlengin zawm ala nilo thung nia thudawn a ni a, niin-a Serchhip Bazar-a Vawksa zuartute chuan kg. ah Rs. 400/- a an zawrh thu an sawi bawk.