Chanchin thar thenkhat :

Tuipuiral-ah lir la nghing zel

Mizoram khawchhak lam, Tuipuiral-a lir-nghing chu ala kal zel niin a lang a, nimin chhun dar 1:21 khan lir hi nghing lehin hei hi mihring hriat theih china a nghin hnuhnun ber a ni rih. Hetianga lir a nghin zui zel avang hian nimin khan bialtu MLA, H. Ramthanmawia chuan East Tuipui Bial khaw hrang hrang Disasater Management Committee kut-ah silpaulin bundle 16 a sem a. ZPM hotute leh MLA thawhkhawm Rs. 3,40,000/- pawh ZPM President, Lallian-sawta chuan Tuipuiral Group YMA kutah a hlan bawk. Tuipuiral-a lir ala nghin zui zel avang hian chhiatrup thlen thulh palha mipuite tlankhawmna tur leh mahni In lum luah ngamlo te tan hulhiap siam hna kalpui zel a ni bawk.

QRT te lawmluhna neih a ni
Khuarel chhiatna emaw, rikrum thil dang emaw a thlen thulha rang taka che nghal thei tura Lawng-tlai District Disaster Management Authority (DDMA) hnuaia Quick Response Team (QRT) din thara Trained Specialist Volunteer-te lawm-luhna chu nimin khan Lawngtlai Bawrhsap, Dr. Andrew H. Vanlaldika hovin a Pisa-ah neih a ni a, Quick Response Team (QRT)-ah hian mi 9 telin Disaster Management & Response lama Training zo tawh niin chhiatna thlen thulhah anni hi che chhuak hmasa tur leh mipui himna atana a tul anga hma la tur an ni.

Online Workshop nei
Indian School Psychology Association (InSPA) leh Directorate of School Education tangdun buatsaihin nimin khan Aizawl District chhunga Higher Secondary School Lecturer-te tan ni hnih awh tur zirlai naupangten rilru hrisel tak pu chunga nun an hman theihna tura an puih theih dan turte sawihona chu Online hmanga neih a ni a, he hunah hian Aizawl District chhunga HSS tin atangin Lecturer pahnih zel tel tura tih an nih angin mi 150 chuang an tel a, State pawnlama mithiam 6 ten Resource Person niin he hun hi an hmanpui bawk a ni.

DDK Director hlui boral
Doordarshan Kendra, Aizawl-a Director hna chelh hmasa ber, Sailothanga Sailo (76), Aizawl Vaivakawn chu nimin chawhnu dar 2:15 khan Cancer avangin a boral a, Vawiin ah vuiliam a ni ang. Sailothanga Sailo hi April 20, 1944 Zawngin khua ah a piang a, Assam Civil Secretariat leh State Bank of India ah te a thawh hnu kum 1976-ah All India Radio-ah a thawk \an a, kum 1994 a\anga 2004 thleng khan DDK Aizawl-ah Director hna chelhin kum 2009-ah a pension a ni.

Thuthang diklo tih sawi
Nimin khan Social Media hrang hrangah Quarantine Center Lawngtlai atangin hrivei mi pahnih an tlanchhuak anga thehdarh a ni a, hei hian mipuite pawh a ti chi-ai viau a, he thuthang hi hriat a nih velah thuneitute chuan Quarantine Centre hi enfiahin tlanchhuak an awmlo tih finfiah a nih hnuah hetianga mipui ti chi-ai thei thu vawrhdarh a nih avangin Lawngtlai DLTF hmingin Lawngtlai Police Station-ah First Information Report (FIR) thehluh a ni.

Comments

Chhiar Hlawhte