India ramah hri kai hmuhchhuah nuai 9 an tling

India rama COVID-19 hri kai hmuhchhuah chuan nuai 9 an tling ta a, hri kai zinga zaa 63.02 te chu enkawl dam an ni tawh thung.

Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 2,86,247 enfiah leh niin heng atang hian hri kai hmuhchhuah thar 28,498 an awm leh a, heng te nen hian hri kai hmuhchhuah zawng zawng hi 9,06,752 an tling ta a ni. India rama hri kai hmuhchhuah atang hian mi 5,71,459 te chu enkawl dam ni tawhin hei hi hri kai hmuhchhuah atangin zaa 63.02 a ni tawh a, tunah hian hri kai enkawllai 3,11,565 awmin hri kai lai aiin enkawl dam hi 259,894 in an tam zawk a ni.

Darkar 24 kalta chhung khan hri kai nunna chan 553 awm lehin hri kai zinga nunna chan chu mi 23,727 an tling tawh bawk a, hei hi hri kai hmuhchhuah zawng zawng atangin zaa 2.61 a tling bawk a ni. ICMR chhinchhiah dan chuan India rama sample test tawh zawng zawng hi 1,20,92,503 a tling tawh a ni.