Hri kai hmuhchhuah mi nuai 6 an tling ta

India rama COVID-19 hri kai hmuhchhuah chu nuai 6 an tling ta a, hri kai zingah nunna chan mi 17,834 an awm tawh bawk.

Nimin a Ministry of Health & Family Welfare chhinchhiahna atanga a lan danin darkar 24 kalta chhung khan rampum-ah Sample 2,29,588 enfiah leh niin heng atang hian hri kai hmuhchhuah thar 19,148 an awm a, heng mite nen hian hri kai hmuhchhuah zawng zawng chu 6,04,641 an tling ta a ni. India rama hri kai hmuhchhuah atang hian enkawl dam mi 3,59,859 awm tawhin hei hi hri kai hmuhchhuah atangin zaa 59.51 an ni a, tunah hian hri kai enkawllai 2,26,947 la awm bawkin hri kai enkawllai aiin enkawl dam hi 132,912 in an tam zawk a, darkar 24 kalta chhung khan mi 11,881 te chu dam-ah puan an ni bawk.

Hetihlai hian darkar 24 kalta chhung khan hri kai zingah nunna chan mi 434 an awm leh bawk a, heng mite nen hian nunna chan hi 17,834 awm tawhin hei hi hri kai hmuhchhuah atangin zaa 2.94 a ni bawk. ICMR chhinchhiah dan chuan India rama sample test tawh zawng zawng hi 90,56,173 an tling tawh bawk a ni.