Commerce and Industries Minister hovin thukhawm

Commerce and Industries Minister Dr. R.Lalthangliana chuan thalaite tan Commerce and Industries Department huanga Food Processing, Handloom, Textile, Bamboo, Mineral Resources leh a dangte hmangin eizawnna tam tak siam belh theih a ni, a ti.

Nimin a SAD Conference Hall, Aizawl-a Industrial Development Board leh an Department-a Officer te nen Meeting an neih ah he thu hi sawiin Dr. R. Lalthangliana chuan COVID-19 avangin India ram chauh ni lo, khawvel ram hrang hranga sawrkar liante pawhin harsatna an tawk tih sawiin, hmasawnna hna a thawh theih tak tak loh tih a sawi a. COVID-19 avanga eizawnna hloh te leh eizawnna tur dap mek thalaite tan Commerce and Industries Department huanga Food Processing, Handloom, Textile, Bamboo, Mineral Resources leh a dangte hmangin eizawnna tam tak siam belh theih a ni tih sawiin, Officer rual kalkhawmte chu ngaihtuahna thar seng turin a fuih a, “Commerce and Industries hmalakna zau zia leh ken tel a ngah zia thlirin he Department hnuaia hmalakna te a kal fuh chuan Mizote tan innghahna tlak eizawnna tam tak siam theihna kawng a awm,” a ti bawk.

He hunah hian Commerce and Industries Director, J. Hmingthan-mawia pawhin lockdown avanga hnathawk thei lo, Small and Medium Industry te damkhawchhuahna tura sawrkar laipuiin hmalakna thar a puan te sawifiahin, heng Scheme-te hi Mizoram-ah pawh chhawr tangkai ve theih a nih dan te, Mizoram Industrial Policy siamthat mek leh New Market building sak that tura hmalakna kal mek te a sawifiah bawk.