Congress Party in hrethiamlo

MPCC Media Department chuan sawrkar hnathawk hlawh pek kim theihloh laia fair lo taka hna inpek awm reng chu an hriatthiamloh thu an sawi.

Nimin a Aizawl-a thuthar thehdarhtute an kawmna ah MPCC Media Department chuan MNF sawrkarin sawrkar hnathawkte hlawh Group A-15%, Group B-10% leh Group C & D - 5% thla 3 chhhung batsak tuma ruahmanna a siam chu June thla hlawh lak atangin a takin a kalpui tan a ni tih sawiin, hetiang a nih lai hian sawrkar Department hrang hrangah Party mite tan contract vaibelchhe tam tak pekchhuah reng a ni thung tih an sawi.

MPCC Media Department chuan RTI chhanna atanga a lan danin Sports Council hnuaiah ringawt pawh Lockdown neih lai, May thla atanga June 23 thleng khan contract hna pasarih, cheng nuai 825 (vbc. 8.25) man pekchhuah a ni tih sawiin, heng hna zawng zawngte hi hman-hmawh taka thawh ngai miah lo a nih bakah a thawktu tur ruahman sa veka Restricted Tender hmanga pek a ni tih an sawi a. MNF sawrkar in sum harsatna chhuanlama sawrkar hnathawk te hlawh pawh a pek kim theih loh laia fair lo taka vaibelchhe tam tak man hna inpek awm reng si  chu an hrethiam thei lo tih an sawi a ni.

Hei bakah hian MPCC Media Department chuan May 7, 2020-a Speaker hova Legislature Party hrang hrang aiawhten Meeting an neih tumin, ‘Congress Legislature Party-te an kal loh avangin COVID-19 Fund atana an hlawh cut chungchang leh MLA-LADS Fund thawh chungchanga thutlukna chu an zalennaah dah a ni,’ tia zalenna zau tak an lo pek vek tawh thu pawh sawiin, hei vang hian Congress MLA-ten CO-VID-19 dona atana MLALADS Fund an hman danah Party dang MLA-ten sawisel theih pakhat mah an nei lo tih chu an ngaihdan a nih thu an sawi bawk.