Hri kai hmuhchhuah 227 awm tawhin mi 150 dam tawh

Nimin zing thleng khan Mizoram-ah COVID-19 hri kai hmuhchhuah mi 227 awm tawhin mi 150 te chu enkawl dam an ni tawh.

Sawrkar thuchhuah tarlan danin Zirtawpni khan ZMC Laboratory-ah Sample 295 leh Lunglei-a TrueNat Laboratory-ah Sample 29 enfiah a ni a, heng atang hian hri kai hmuhchhuah thar an awm lova. Inrinni khan ZMC Laboratory-ah Sample 271 enfiah leh niin hri kai hmuh-chhuah an awm lova, Lunglei-a TrueNat Laboratory-ah Sample 28 enfiah niin heng atang hian hri kai hmuhchhuah pakhat a awm a, hri kai hmuh-chhuah hi mipa kum 34 mi, Melte-a BSF Cook, Quarantine lai niin hri kai hmuhchhuah tawh nen lo khawsa ho tawh a ni. Inrinni-a Sample enfiah-a hri kai lo te zingah hian BSF Sipai dangte leh tunhnaia-a BSF sipai hri kai inentirna hmuna inentir te bakah an lo tlawhpawh hnai deuh te pawh an tel a. Hei bakah hian ZMC-a hri kai lo an nemngheh zingah hian tunhnaia Lawngtlai a hri kai hmuhchhuah te chawlhna Dawr nghaktute pawh telin anni hi a tum hnihna atan hri an kai lo tih nemngheh a ni leh ta a ni.

Heti hian nimin thleng khan Mizoram-ah hri kai hmuhchhuah mi 227 awm tawhin heng te hi Mipa 138 leh hmeichhia 89 an ni a, an zinga mi 150 te chu enkawl dam ni tawhin mi 77 enkawl mek an ni a, nunna chan an la awmlo zel a ni.