Hna chan tur 2018 an awm

Mizoram Youth Commission (MYC) chhin-chhiah danin Mizoram pawna hnathawk mi 7742 an awm a, heng zinga 2018 in hri leng vangin hna an chan.
Zawhna chhangin MYC Chairman Dr. Vanlaltanpuia MLA chuan, rampawna hna-thawk hri leng vanga hna chan ta ten eizawnna an neih leh theih nan kawng an dap mek tih a sawi a, Department hrang hrangte nen pawh hmalak dan tur an sawiho tawh thu sawiin, ruahmanna mumal tak duan chhoh an tum tih a sawi.
MYC Chairman chuan Mizoram pawn a hnathawk, hna chan zingah hian Hotel, Restaurant, Steward leh a kaihhnawih hna thawktu an tam ber tih a sawi a, hetiang hnathawk hi 783 an awm a, Beauty parlour, Spa, Therapist leh Make-up lam thawk thin 632 an awm a, Lawng leh a kaihhnawiha thawk 215 bakah hnadang thawk 102 an awm tih a sawi bawk.
Dr. Vanlaltanpuia chuan, hna chan ta zingah 165 in an hna chhunzawm leh theih an in beisei tih pawh sawiin, a bak zawng chu chan hlen tura ngaih an nih thu a sawi a. State pawna hna-thawka awm MYC in a chhinchhiah tawh zingah hian pawl 10 hnuailam tam berin 978 an awm a, pawl 12 pass 766, Graduate 241, Post-Graduate 23 leh thiamna ziahlan loh mi 10 an awm a, hna chan zingah hian Aizawl District mi an tam ber thung a, mi 789 awmin Siaha District 380, Kolasib District 160, Champhai District 130 leh Lunglei District 113 an awm a, a bak zawng hi za tlinglo vek niin Mamit District 96, Lawngtlai District 79, Hnahthial District 75, Serchhip District 74, Saitual District 65 leh leh Khawzawl District mi 57 an awm a ni.
Mizoram pawna hnathawk zingah hian India West Zone a hnathawk an tam ber a, mi 2616 zet an awm a, South Zone-ah mi 2411, East leh Central Zone-ah mi 692, North East Zone-ah mi 643 leh North Zone-ah 1380 an awm a ni.

Comments

Chhiar Hlawhte