Hna chan mi 2000 chuang inziaklut tawh

Hripui leng avanga hna chan, Mizo thalai 2000 chuang Mizoram Youth Commission (MYC)-ah an inhriattir tawh.
COVID-19 avangin Mizo thalai phai lama hnathawk tam takte chuan an hnathawh lai chhunzawm thei lovin Mizoram-ah an lo haw khawm a, Chief Minster Zoramthanga thurawn angin Mizoram Youth Commission chuan heng thalai hna chante kawng engemawti a tanpui dan a awm theih nan an nihna kimchang an lakhawm a, District tin Bawrhsap te hnenah lehkha thawnin heng mite lo dapchhuahpui turin MYC chuan a ngen a ni.
Mizorama lo haw, hna chante tan hian Google Form-ah MYC Survey form tih ah inziahluh theih a ni a, thla hmasa, June ni 15 thleng inziahluh hun hawn ni mahse inziaklut duh an awm zel avang leh lo haw an awm belh zel avangin hun hi hawn belh mek a ni tih MYC thuneitute chuan an sawi a, Zirtawpni thleng khan inziaklut mi 2018 an awm tawh a ni. MYC hi heng hna neilo inziaklut te tana hna pe theitu nilo mahse Department dang nen thawkho in an eizawnna atana thiam thil zirna hun ruahman an tum a, MYC Chairman, Dr. Vanlaltanpuia, MLA hoin hmalak zel dan tur an la sawiho leh dawn a, hna chante hlawkpui theih dan tur leh an eizawnna kawng kawh hmuh thei tura hmalak an tum a ni.

Comments

Chhiar Hlawhte