Aizawl Smart City project hnuaiah cheng vbc. 41 zet a riral thei dawn niin ZPM ten an hria

ZPM chuan Aizawl Smart City Project hnuaia hmun hrang hranga CCTV System (Integrated Control and Command Centre - ICCC) dah tura hmalakna kal mekah cheng vbc. 41 zet chu tu ten emaw an fanghmano eiin a riral ngei dawn nia a lan thu an sawi.
Inrinni-a thuchhuah an siamah ZPM chuan Ministry of Urban and Housing Affairs atanga sum lokal, Aizawl Smart City Project hnuaia Aizawl khawpui hmun hrang hranga CCTV system dah turin Bharat Electronic Limited (BEL) hnenah contract cheng vbc. 101.02 man pek a nih thu leh he hna hi BEL chuan anmahni in thawk lovin vbc. 60-a hralh lehchhawn tumin Tender a chhuah leh mek nia sawiin, heti a nih chuan vbc. 41 an fanghmano ei dawn tihna a ni tih an tarlang a. BEL Tender chuah chu a chhangtu tupawhin hna chu hmuin lo thawk dawn sela an hnathawhna tur hmanrua - khawl leh bungrua zawng zawng leina tur company thlenga ruat sakin an tender-ah hian tarlan a ni tih pawh tarlangin, BEL hi Belgavi, Agar, Namchi, Delhi leh hmundangah te hna an thawh chhiat avangin an lo hmingchhe viau tawh tih an tarlang a. Belgavi-ah hian Aizawl-a an tihdan ang bawkin midang hnenah an lo hralh chhawn tawh thu leh a hunah an zawh theihloh thu te, Delhi-ah pawh a hun taka hna an zawh theih loh avangin sawrkar chuan cheng vbc. 16 lai chawitir a lo tum mek bawk tih an tarlang bawk.
Hetiang a ni chunga Aizawl Smart City Project hnuaiah hlawk uchuak taka contract an la rawn hmu thei chu mak an tih thu ZPM chuan tarlangin, India sawrkar Ministry of Urban & Housing Affairs chuan BEL hi PSU a nih angin a duhsak thu te, State leh UT sawrkar te pawh contract hi lo pe tur chuan a recommend ngei thu leh chung zingah chuan Mizoram pawh a tel thu tarlangin, amaherawh chu State leh UT sawrkar te hian an zawm ngei ngei tur tihna a nih loh avangin state thenkhat chuan an hna a chhiat em avangin BEL hi contract pe kher loin Open Tender an chhuah fo tih an tarlang a. Mizoram sawrkarin engmah sawisel nei lova hetianga BEL an duh ang nga an tal tir mai mai chu a ngaihthatthlak loh hle-a an hriat thu an tarlang bawk a ni.
Hetihlai hian Aizawl Smart City Project-a Chief Executive Officer, Er. Lalrothanga chuan BEL chu sawrkar laipuiin Agency atana a ruat a ni tih sawiin, “ICCC hna reng rengah System Integrator an awm a ngai thin a, System Integrator chu khawl hrang hrang lo thlunzawmtu tur a ni a, hei hi an hmang ngei ngei thin a. State dangah pawh SI an hmang vek a, Aizawl atan pawh zawn mek a ni a. Hna hralh lam ni lovin BEL in anmahni thiam lam an khawih ang a, SI in an bak an thawk dawn zawk a ni,” a ti a. BEL chuan an hnathawh kawngah hmingchhiatna an neih awm an la hriat loh thu sawiin, hmarchhak bial-ah pawh hna an thawk mek niin a sawi bawk.

Comments

Chhiar Hlawhte