Latest News

Chanchin thar thenkhat :

Hri kai 5 hmuh belh leh

Nimin khan Mizoram-ah COVID-19 hri kai hmuhchhuah 5 awm lehin Mizoram-a hri kai hmuh-chhuah zawng zawng chu 191 an tling tawh. Nimin khan Lunglei-a Truenat khawl-ah sample 25 enfiah niin heng zingah hian hri kai hmuhchhuah 5 an awm a, heng mite hi BSF Sipai, Vanhne Quarantine Centre-a awmlai vek niin State pawn atanga rawn haw leh BSF Chaw chhum (Cook) te an ni a, anmahni-ah hri kai lanchhuahna neilo vek an ni. Heti hian nimin thleng khan Mizoram ah COVID-19 hri kai hmuhchhuah 191 an awm tawh a, mi 133 te chu enkawl dam ni tawhin mi 58 enkawl mek an ni a. Hri kai enkawl tamna ber Aizawl District-ah mi 21 enkawl mek an la ni a, Siaha District-ah mi 13, Mamit District-ah mi 10, Lunglei District-ah mi 8, Lawngtlai District-ah mi 4, leh Champhai District-ah mi 2 te enkawl mek an la ni.

SDRF te tirchhuak dawn
Disaster Management & Rehabilitation Minister, Lalchamliana hovin nimin khan khan Aizawl-a Secretariat Conference Hall-ah tunhnaia Mizoram khawchhak lama lirnghing chung-changa hmalak dan tur sawihona neih a ni a, mipuite manganna te thlirin a tul huna che mai thei turin Dungtlang-ah State Disaster Response Force te dah lailawk an rel a. MZU-a mithiam te telna Psychological Clinic huaihawt pawh relin, Team hrang hrangah inthenin khaw 30 tlawha mipuite thlamuan turin July 9-ah Aizawl atangin chhuak se an tih bakah mipuite hnena inven dan zirtirna nasa zawk buatsaih an rel bawk.

MHSHTA tan tanpuina hlan
Mizoram High School Hindi Teachers Association (MHSHTA) chuan nimin khan Bairabi North leh Bairabi South VLTF te tanpuina atan Rs.60,000/- ve ve an hlan a, tanpuina sum hi Bairabi-ah kalin an hlan a ni. MHSHTA-ah hian Member 280 awm mekin tanpuina an hlan hi an Basic Pay atanga 5% an thawh niin a hma lamin sem engemaw zat an lo thawh tawh a ni.

Khawchhak-ah lir la nghing
Thla hmasa June 22, 2020-a Mizoram khaw-chhak lam Tuipui ral-a na taka lir a nghin hnuah niminpiah, a ni 14-a thleng khan mihring hriat theih chin tum 50 zet lir hi nghing tawhin magnitude 4 aia sang vawi 6 a nghing tawh nia hriat a ni a, Cham-phai District Disaster Management Team te chuan nimin khan khaw hrang hrang an tlawh a ni.

Lawngtlai DC in hma la
Lawngtlai DC, Dr. Andrew H. Vanlaldika chuan tunhnaia Lawngtlai District mi, State pawn atanga rawn haw zingah an haw kawnga dan kalh a che-a chawl khawmuang an awm chu pawi a tih thu sawiin, heng dan bawhchhetute hi an phu tawk hremna an tawrh theih nan hma lak nghal a nih thu a sawi bawk.

Thorang Block MNF in bialtu MLA an phut
Thorang Block-I MNF chuan an bialtu MLA, Zodintluanga Ralte-in Lunglei mipuite tan MLA Fund hmanga Ambulance leh RT-PCR khawl a lei chu Lunglei mipuite an lawmpui thu sawiin, he khawl hi hman theih a nih thuai theih nan a inhuam anga MLA Fund hmanga ngaihtuah vat tura an duh thu an sawi. Hei bakah hian a bial chhung Lungsen PHC chuan kum 10 kalta khan X-Ray khawl leh Ultra Sound khawl an lo kawl tawh tih sawiin, heng te hi hman tangkai a nih theih nan MLA Fund atanga ngaihtuah sak an phut thu an sawi bawk.

Comments

Popular News (Last 30 Days)