Chanchin thar thenkhat :

Taiwan atangin puihna dawng

Taiwan atanga COVID-19 dona atana Mizo-ram-in puihna a dawn, Hmai tuamna (N-95 Masks leh 3-Layer Masks) leh RT-PCR Test kits chu nimin khan Chief Minister, Zoramthanga hnenah hlan a ni. Mizoram sawrkar hian Taiwan sawrkar atangin cheng nuai 45 man hu puihna dawngin heng te hi N-95 Mask 35,000 leh 3-Layer mask 35,000 a ni a. Heng bakah hian Meiho University, Taiwan hnen atangin RT-PCR Test kits, Peptide Cham Biotech Co., Ltd. in an siam-chhuah chu dawng bawkin Test kits hi cheng nuai 15 man hu nia chhut niin nimin khan Chief Minister hnenah hian hlan a ni a, hemi hnu hian Health & Family Welfare Department hnenah hlanchhawn nghal niin Health Department-a record a nih hnuah Test Kit hi ZMC-ah dah nghal tura ruahman a ni.

DEOC leh Jail tlawh
Mizoram Home Department leh DM&R-a Secretary, Lalbiaksangi chuan nimin khan Siaha leh Lawngtlai-a District Emergency Operation Centre (DEOC) tlawhin rikrum thila hman tur bungraw hrang hrangte a enchiang a, an District-a Bawrhsap ten lo dawngsawngin an mamawh te a lo thlen nghal bawk. Home Secretary hian Siaha District Jail te pawh tlawh nghalin Jail chhunga awmte dinhmun a en bakah, Dan in an chunga ro a rel angin thu awih taka awm turin a fuih a, Jail chhunga awm ten mamawh an thlen te chu a tul anga a bawhzui tur thu hrilhin, an chawhmeh leina tur sum a pe bawk.

MIMA in fimkhur turin chah
Mizoram-a sumdawng pawl, Mizoram Merchant Association (MIMA) chuan Mizoram-a sumdawngte an fimkhur avangin sumdawngte atangin COVID-19 Positive hmuh tur an la awmlo nia sawiin, lawmawm an tih thu nimin khan thu-chhuah siamin an tarlang a, sumdawngte chu midang nena inhlata awm tha taka vawng zel tur leh kut silfaina (Hand sanitizer) te Dawr kawngka a hman mai remchang a chhawp turin an in hriattir bawk.

MHIP in thihna an dem
Tunkar Thawhtanni zan khan Lalremruati (39) d/o Lalhmingmawia, Lungdai chu an chenna In-ah thiin pasal anga a chenpui, Thomas Lalthla-muana (49), Lungdai in kut a thlak avanga thi nia hriat a ni a. He thil thleng hi MHIP General Hqrs. chuan an dem thu leh pawikhawihtu a puh hi Dan anga na taka hrem tura thuneitute an phut thu an sawi bawk.

Dan bawhchhia man tam tawh
Mizoram-ah May 4, 2020-a The Mizoram (Containment and Prevention of Covid-19) Ordinance, 2020 hman a nih hnuah nimin thleng khan he Dan bawhchhia mi 16,291 man an ni tawh a, mi 10075 te chu Police man niin Flying Squad ten mi 4680 leh Local Task Force ten mi 1536 an man tawh bawk. Heng mi an man te pawisa chawi tlingkhawm hi Rs. 34,32,200/- zet a tling tawh a ni.

Comments

Chhiar Hlawhte