Mizoram-ah Bank 26 awmin Branch 210 a awm

Kumin March thla thleng khan Mizoram-ah Bank 26 awmin heng Bank hrang hrangte hian Branch 210 an nei a ni.
State Level Bankers Committee (SLBC) Mizoram thutkhawm chu niminpiah khan Chief Secretary, Lalnunmawia Chuaungo IAS kaihhruaiin neih a ni a, he hunah hian Chief Secretary chuan Bank ten sum an dawn atanga Loan an pek-chhuah, CD Ratio chu State dangte aiin Mizoram-ah ala hniam hle tih sawiin, hei hi Bank-ten loan an pekchhuah tlem vang a ni, a ti a. Mizoram-a Bank awmte chu State chhunga chengte hnena loan pek chungchangah beiseina sang tak a neih thu sawiin, Bank thenkhat, abik takin Private Bank-te chu sawrkar atang leh mipuite deposit lo dawng tur ringawt ni lovin State hmasawnna tura mipuite hnena loan pekchhuah lamah hma la nasa lehzual tur leh mipui tana thawk tam leh zual turin a chah bawk.
He huna tarlan a nih danin Mizoram-ah Bank 26 awmin Branch 210 a awm a, heng te hi Public Sector Bank Branch 81, Private Sector Bank Branch 24, Regional Rural Bank Branch 86 leh Co-operative Bank Branch 19 te a ni a. Kum 2019-20 Financial Year chhung khan sum dahluh cheng vbc. 12,564 awmin Loan an pekchhuah chu cheng vbc. 4947.77 a ni a, sum dahluh atanga loan an pekchhuah, CD Ratio chu 39.38% chauh a ni.
Priority Sector-a loan pekchhuah chu cheng vbc. 2661.88 niin Agriculture loan cheng vbc. 628.42 leh MSME (Industry leh Business) loan pekchhuah chu vbc. 996.25 a ni bawk.

Comments

Chhiar Hlawhte