Chanchin thar thenkhat :

DC in chhawmdawlna sem

Champhai District Bawrhsap, Maria CT. Zuali leh an District-a thuneitu dang intelkhawm chuan Inrinni khan lirnghing tuar Khuangthing leh Zawlsei khuaa chhungkaw 26 te hnenah chhawm-dawlna an pe. Tunhnaia henglai bial-a lirnghing avang hian Khuangthing khuaah hian In chhe zual chhungkaw 9 awmin a chhe nêp deuh chhungkaw 9 an awm bawk a, Zawlsei-ah chhe zual chhungkaw 3 awmin a chhe nêp deuh chhungkaw 5 an awm bawk a ni. Disaster Management & Rehabilitation atanga chhawmdawlna chu In chhe nasa zual hnenah Rs. 15,000/- cheque hlan niin a chhe nêp deuhah Rs. 5200/- hlan an ni thung. Cham-phai DC hian lirnghing avanga chhiatna thleng te pawh a hmunah a tlawh bawk a ni.

Thlawhna service tan leh

Zirtawpni atang khan Aizawl leh Kolkata inkar ah Indigo Airlines chu a thlawk ve leh tan ta a, ruahman lawk ang chuan kar khatah ni 3, Thawhtanni, Zirtawpni leh Inrinni-ah te Aizawl leh Kolkata inkarah a thlawk thin dawn a. Air India chu Thawhlehni, Nilaini leh Ningani-ah te an thlawk thung anga, Pathianni-ah erawh thlawk a awmlo thung ang. Principal Consultant (Aviation), J. Lalhmingliana chuan Aizawl-Guwahati leh Aizawl-Delhi inkar thlawhna service chu hri leng avanga Mizoram sawrkarin tul a la tih loh avangin thlawh tir a ni rihloh thu a sawi a, tunkar Ningani, July 9, 2020 atangin Mizoram khawpui hrang hrangah Helicopter service chhun-zawm tir an tum tih a sawi bawk.

Chhungkaw 3 te khunghrang

Inrinni-a Lawngtlai-a COVID-19 hri kai an hmuhchhuah mi 2 te chu Lawngtlai an panna ah Thenzawl-a Restaurant-ah chawl-a thil te an lei avangin heng mite nena lo in awmhnaih chhui nghal an ni a, an chawlhna Restaurant neitu leh a kawt-a thil zuar chhungkaw pathum (3) te chu In lamah khunghran nghal an ni a. Heng chhung-kua te hi Vawiin lamah an Sample lak nghal tura ruahman a ni bawk.

Scho thun zawh hman beisei

Mizoram Co-operative Apex Bank (MCAB) chuan Tribal Scholarship chu Inrinni tlai khan zirlaite Bank Account-ah thun zawh hman an beisei tih an sawi a. MCAB Chief Executive Officer, Lalzuahliana chuan, “Khawl hmanga hna thawk kan ni a, tluang taka hna kan thawh theih chuan Inrinni (4.7.2020) hian account-ah thun zawh vek theih kan beisei a ni,,” a ti a ni.

Tuitla ruang hmuh a ni

Zirtawpni chawhnu lama Thenzawl leh Buarpui inkar, Tlawng lui-a chesuala tui-a tla, Lalnunsanga s/o Lalthanglawta, North Khawlek chu Inrinni chhun khan a chetsualna atanga ft. 100 vela hla aha ruang hmuh niin vuiliam nghal a ni. Lalnunsanga hi pawl 10 zirlai niin Tantia Company hnuaia Sub-Contract a hna thawk te hnuaia inhlawhfa niin a inbual tur a chesual a ni.

Work Order hal pawi ti

MNF Thalai, Mizo National Youth Front (MNYF) chuan Congress Thalai, Mizoram Pra-desh Youth Congress Committee (MPYCC) ten ram hmasawnna hna thawhna tur Work Order an hal chu pawi an tih thu an sawi. Inrinni-a thu-chhuah an siamah MNYF chuan Sawrkar-in Work Order a siam reng reng hi ram hmasawnna tur vek a ni tih an tarlang a, a thawktu chu tu pawh nise, eng Party mi pawh nise, an hnathawh tur kha ram hmasawnna tur vek a ni, an ti a. Hemi a nih avangin Work Order tihchhuah hi eng sawr-kar ah pawh, eng hunah pawh a thleng reng tih tarlangin, “Zoram in hun harsa leh khirh tak a tawng mek a, hripui leng karah ei leh bara kan intodelhna tur te, ramin hma a sawnna turte in sawrkarin hma a la ve zel a. Hripui leng kara ram hmasawnna hna thanthu lova a la kal zel thei hi Finance Department fel taka enkawltu Pu Zoramthanga kan chhuang hle a ni,” an ti bawk.

ZPM in pawi tih thu an sawi

ZPM chuan hri leng avanga rampumin harsatna khirhkhan tak kan tawh denchhena mimal leh Party tana hmingthat lak tumna anga ngaih theih thil a awm leh thin chu pawi an ti takzet tih an sawi. ZPM Elected Office Bearers te chu Zirtawpni khan thukhawmin tunhnaiah MLA pakhatin mipui sum, MLA-Local Area Development Fund hmangin natna hrik enna khawl a lei thu leh, a chhawr phak tur mipuiten an mamawh hmanhmawh tawh laia, sawrkar-a a pekluh tum danah leh sawrkarin a lo dawnsawn tum danah politics-a hamthatna neih tel duhna leh ham-thatna dawng an awm ang tih hlauhna nia ngaih theih thu inchuh, a dik zawk hriat harsa khawpa inpuh tawnna a awm chu pawi an ti takzet tih an sawi a. Tunah tha taka an inhlan thei ta chu lawm-awm an tih thu leh tunhnuah khatiang chi kha thleng tawhlo se tiin, ram hruaitute chu inzah tawn takin mipui rawng bawl thin turin an ngen bawk.