Ambulance pek chungchangah thuchhuah siam


Serchhip-VII Village Council huamchhunga awm Serchhip Chanmari Veng Congress Unit I&II Joint Committee chuan Serchhip-VII VC in Serchhip District Hospital a hman tur EECO Van Ambulance an pek chu Serchhip District mipui tan thil lawmawm leh chhuanawm tak a nih laiin Serchhip-VII huamchhunga mipui tan chuan ngaihtuah zui tur tam tak a awm nia an hriat thu an sawi.
An thuchhuah a ngai ngaiin :

Serchhip Chanmari Veng Congress Unit-I & II

Joint Press Release
Kan hriat angin Serchhip-VII Village Council te chuan Serchhip District Hospital a hman tur EECO Van Ambulance, Rs. 615376/- (cheng nuai ruk sing khat sang nga zathum sawmsarih paruk) lai sengin an pe a. He thil hi Serchhip District mipui tan thil lawmawm leh chhuanawm tak a nih laiin Serchhip-VII huamchhunga mipui tan chuan ngaihtuah zui tur tam tak a awmin kan hria a ni.
Ambulance leinaah hian mipuiin MGNREGA sum kan thawhkhawm sawi lan tel a ni lo na a, an hnathawh dan leh kalphung enin keini chuan tel lo thei lovah kan ngai a. Kan huamchhunga hnathawh tur tam tak awm, sum awm loh chhuanlama an thawhloh laia kan area pawna hma an la ta mai hi hriatthiam harsa kan ti a. VC hun ral tawh, hripui vanga term pawhsei, naktip lawka inthlan hmachhawn mai tawh tur nih laia he thil an ti hi inthlan leh thlira Vote zawnna dik tak ni ah kan ngai a. Huntiam pangngaiah VC Term kha zo ta se he sum hi engtia kalpui nge an tum ang tih hi zawhna awm thei tak a ni. Serchhip-VII VC an nih anga Fund lokal leh mipui thawhkhawm hmanga an huamchhunga thawh tur awm tawh lo ang maia thil an ti hi tualchhung mai ni lo, ram puma politics thila kawng an insialna liau liau ah keini, Serchhip Chanmari Veng Unit-I & II Congress chuan kan ngai bawk a. Hetiang thil lian tham hi an ti dawn a nih chuan an sum hmuh theihna chhan ber Serchhip-VII mipuite an rawn ve ngei turah kan ngai bawk a ni.
Tin, he thil an tih tur hi Health Minister Dr. R. Lalthangliana pawh hriattir niin kan lo hria a. Lunglei Damdawi In-a Covid-19 hri enna khawl RT-PCR Pu Zodintluanga MLA pek dawng duh lova, a theih dan chikima an dan beh hnu a, mipui nawrna avanga tlai khawhnua hreh em em a Lunglei Damdawi In-a an lakluh leh tak hram dan pawh kan hria a. Keini Serchhip-ah erawh chuan a enkawl zuina tura Driver leh thawktu dang ken tel ngah tak ve tho Ambulance petute hi MNF VC an ni miau a, harsatna siam hauh lovin lawm takin Serchhip District Hospital thuneitute an dawnsawntir mai thei a. Tun sawrkara sum fai ni lova thil pe tur reng reng MNF an nih leh nih loh zirchian hmasak zel a ngai nia lang hi tha lo kan ti em em bawk a ni.

Issued by :

Serchhip Chanmari Veng Congress Unit-I&II Joint Committee

Comments

Chhiar Hlawhte