VC ten mipui rawn tul ti lo

Serchhip-VII Village Council chuan tunhnaia Serchhip District Hospital-a Ambulance an hlan tak leina atan mipui sum cheng khat pawh a tello nia sawiin, hei vang hian mipui rawn pawh tul an tihloh thu an sawi.

Serchhip-VII Village Council ten Press Handout an siamah Serchhip District Hospital tana Ambulance an donate theih dan tarlangin, VC te hian sawrkar atangin VC te intuamhlawmna tur development sum hrang hrang an hmu thin tih an tarlang a. Tun VC term kal mek te pawh hian Excluded Area Development Fund te, State Finance Commission Grant te, Material Component te dawngin heta an thawhna bang te hi VC te chanai liau liau niin VC te hian hei hi lo insemin emaw, tul leh tha an tih angin lo hmang pawh nise eirukna (corruption) a ni lo, an ti.

Serchhip-VII VC hian Excluded Area Development Fund atangin (1st leh 2nd installment) Rs. 13,60,500/-; State Finance Commission Grant (1st & 2nd installment) Rs. 4,25,000/- leh Material Component Rs. 5,00,000/-, a vaiin Rs. 1,903,000/- an hmuh thu leh heng hna te hi tha thei ang berin thawk ila, a chuang bang awm ang ang te chu tangkai taka hman nise tiin thu an dah sa tih an sawi a. An hnathawhna a chuang-bang awm ang ang hian Ambulance hi lei nise ti-a thu an tihtluk thu leh he Ambulance leina atan hian mipui sum cheng khat pawh a telloh avangin mipui rawn tul an ti lo tih an tarlang a ni.