Mizoram-ah hri kai pung zel

Mizoram-ah COVID-19 hri kai hmuhchhuah leh enkawl dam an pung zel a, nimin thleng khan hri kai hmuhchhuah mi 186 zet an tling tawh.

Sawrkar thuchhuah in a tarlan danin Inrinni khan ZMC Laboratory-ah Sample 465 enfiah niin heng atang hian hri kai hmuhchhuah 22 awmin a bak 443 te chu hri lakah an him tih nemngheh a ni a, hri kai hmuhchhuah thar te hi Aizawl District mi 14 leh Siaha leh Lawngtlai District mi 4 ve ve an ni. Aizawl District-a hri kai te hi mipa vek, kum 28 leh 55 inkar niin an zinga mi 10 hi National Disaster Responsed Force (ND-RF) mi leh sa niin midang 4 hi Assam Rifles mi leh sa an ni a, Quarantine Centre-a awmlai vek an nih bakah Symtom neilo an ni.

Nimin a Siaha District atanga hri kai an hmuhchhuah te hi Delhi atanga rawn haw te an ni thung a, mipa pakhat leh hmeichhia 3 an ni a, kum 21 leh 26 inkar niin 3 hi Symtom nei an ni. Lawngtlai District-a hri kai hmuhchhuah te hi mipa vek, kum 18-28 inkar niin Guwahati atanga rawn haw an ni thung a, Symtom neilo leh Quarantine Centre-a awmlai vek an ni bawk.

Mizoram-ah hri kai hmuhchhuah belh leh an nih lai hian enkawl dam leh damdawi In chhuahsan erawh an pung ve zel a, Inrinni khan Lunglei-a enkawllai mi pakhat chu damdawi In atanga chhuahtir a nih hnuah nimin khan Siaha DCHC atangin mi pakhat chhuahtir a nih bakah Khawzawl damdawi In atangin hmeichhia 2 te chhuahtir an ni bawk a, Khawzawl District-a hri kai hmuhchhuah te chu enkawl dam an nih hnuah chhuahtir vek an ni tawh a ni.

Nimin thleng khan Mizoram-ah hian hri kai hmuhchhuah zawng zawng mi 186 an tling ta a, heng zinga mi 133 te chu enkawl dam an ni tawh a, mi 53 enkawl mek an ni thung a ni. Tun dinhmun ah District 11 zingah District 5 te chu hri kai awmlohna a ni tawh a, heng te hi Hnah-thial, Saitual, Kolasib, Serchhip leh Khawzawl District te an ni.