ZPM Thalai ten Serchhip P&E Veng, Vety Department mual bula hnathawh chhui chian an duh

Serchhip ZPM Block Thalai chuan Serchhip P&E Veng Vety Department mual kawr-a Hume pipe phum leh a kaihhnawih hna thawh dan chu sawrkar leh thuneitu ten chhui chiang se an duh thu an sawi.
Nimin-a thuchhuah an siamah ZMP Block Thalai, Serchhip chuan Serchhip P&E Veng Vety Deparment mual kawr-a Rs. 78,91,000/- seng-a Hume pipe phum (Project under Chief Minister's Development Priority Fund under SPP during 2018-2019: Construction of Retaining Wall and Laying of Hume pipe near Vety tuikhur at P&E Veng Serchhip) hna thawh chuan duhthu a samlo hle tih tarlangin, he sum hi KTP General Conference 2019, Serchhip-in a thlen dawna lo inpuahchah leh lo inbuatsaih nan Organising Committee in sawrkar hmasa hun lai atang tawh khan an lo buaipui tawh a ni tih an tarlang a. Fund a chhuah ngei theih nan Organising Committee chuan File pawh umzui zelin, an um hlawhtling thawkhat niin an tarlang a. Amaherawh chu, sawrkar rawn inthlakah Fund chu rawn chhuakin, mi thil ti thei tak pakhat kutah a lut ta daih nia sawiin, hemi chungchangah pawh hian sawiselna a nasa tawh hle bawk niin an tarlang.
ZMP Thalai thuchhuah chuan he hna thawh dan tur ruahman ang chuan, kawr chu leivung-a chhung zawlin, kawng kual lutuk tih ziaawm nan leh, Volleyball/Basketball Court siamna tura ruahman leh chumi tur chuan kawr tui luanna Hump Pipe leh leivung dawltu tur, Retaining Wall tha taka siam tura ruahman a ni bawk tih an tarlang a. He hna thawh dan leh kalpui danah sawiselna a nasa hle nia tarlangin, Retaining Wall a derthawng hlein, Hume Pipe innghahna pawh a tha tawk lo hle bawk niin an tarlang a, Serchhip bialtu MLA pawhin he hnathawh hi enin Rs. 15,00,000/- vel bak an seng lo ang tih tura hna chhe taka an thawk chu a dem hle thu a sawi niin an tarlang. Chutianga hna zo anga Bill pawh lak vek tawh ni si chuan Fùr khat pawh dàwl lovin Retaining Wall te chu leivungin a hnawl chim ta mai te; Hump pipe phum te pawh leivungin a delh khawlo zo ta mai te chu pawi an tiin thinrimthlak an tih thu an sawi a. He hna thawh dan chhe lutuk leh tuna a dinhmun chungchangah sawrkar leh thuneitute chu Enquiry Committee emaw dinin chhui chiang se an duh thu an tarlang a ni.
Helai hmuna hnathawh chungchang hi kumin March 4-a Assembly Session-ah khan Serchhip bialtu MLA, Lalduhoma chuan zawhna leh chhanna hunah lo zawt tawhin PWD changtu Chief Minister, Zoramthanga chuan he hna thawhna ah hian Estimate chu cheng nuai 78.91 a nih thu leh Departmental-a thawh a nih avangin he hna thawhna atana sum chu July 24, 2019 khan pek fel a ni tawh tih alo sawi tawh a ni.

Comments

Chhiar Hlawhte