Vawiin-ah khunghranna hmun chhuahsan thei dawn

State pawn atanga Mizoram mi hruai haw tuma Karnataka leh Delhi State atanga Serchhip District-a rawn haw te chu Vawiin hian inkhunghranna hmun atanga chhuak thei tura beisei an ni.

State pawn-a tangkhang hruai haw-a Kar-nataka atanga rawn haw mi 46 te chu Marian H/S-ah khunghran niin Delhi atangin rawn haw mi 42 te chu S. Kawnpui Kohhran Hall-ah khung-hran an ni bawk a, Marian H/S-a khunghran te hi ni 21 an inkhunghran chhungin an sample enfiahin an negative vek bakah nimin khan RAT hmanga enfiah leh niin an dinhmun a that avangin Vawiin ah an chhuak thei dawn a. S. Kawnpui Kohhran Hall ami te hi May 31-a rawn thleng kha niin sawrkar in kaihhruaina thar a siam hnuah nimin khan mi 40 te chu RAT hmanga enfiah leh niin Vawiin-ah an chhuak ve leh thei dawn a ni.

Karnataka atanga rawn haw te RAT hmanga an dinhmun enfiahna ah hian Serchhip District chhunga COVID-19 dona kawnga thawk tura inpe, Jessica Lalremruati pawh a tel nghal a, an hnathawh dan hi Serchhip District Bawrhsap, Dr. Lalzirmawia Chhangte leh SDO (Sadar), C. Lalduhzuali te pawhin an enpui bawk a ni.