ZPM Thalai ten ramri vengtute ring zo lovin a hmuna enfiah turin Home Minister chu an ngen

ZPM Thalai President, Malsawmzuala chuan India leh Bangladesh inrina-a venhim hna thawktu BSF te chu an ring zo lo tih sawiin, ramri hungna venhimna leh a hunga awmlo lai te leh luhruk theihna hrang hrang awmte a hmuna enfiah turin Mizoram Home Minister leh sawrkar thuneitute an ngen tih a sawi.

ZPM Thalai General Hqrs. hian tun kar Thawhlehni leh Nilaini khan an President, Malsawmzuala hovin Tlabung-a Mizoram leh Bangladesh ramri hungna (border fencing) chu an enfiah tih sawiin, May ni 31-a Group YMA hruaituten Surprise Checking an neihna a Bangladesh atanga lo lut min 3 an manna, Border Fencing Gate No. 26 an tlawh tih an sawi a. Border Fencing-a Gate-te hi lawnliam awl takte an ni tih leh YMA-in hma la lo se chuan kalh mumal lohvin a awm reng dawn tih an hmu tih sawiin, Bangladesh nena min daidangtu Border Fencing tlawha kan kal hian KM 6 vel an tlannaah BSF duty hmuh tur an awmlo niin an sawi. ZPM Thalaite chuan Lei (bridge) hnuai atanga awlsam taka Bangladesh atanga lo luh theihna hmun leh KM chanve dawn lai Border Fencing awm lohna, awlsam taka Bangladesh atanga Mizoram an lo luhruk theihna hmunte an tlawh tih pawh sawiin, heng hmuna Duty YMA te an tlawh thu leh ram venhimna atana an inpekna chu fakawm an tih thu an sawi bawk.

Heng ramri an tlawhna chungchang hi sawiin ZPM Thalai President, Malsawmzuala chuan a him tawklo an tih thu a sawi a. “Tuna BSF duty-te kan ring zo lova, tuna 60 Battalion awm mekte lakah helaia Mizo awm te'n harsatna an tawh thin avang leh an hnathawhah duhkhawp lohna tam tak a awm avangin an hotupa, Post Commander, Joy Sankar hi hmun danga sawn a nih ngei kan duh a, chumi atan chuan hma kan la dawn a ni,” a ti.

Hei bakah hian ZPM Thalai President chuan ramri hungna venhimna leh a hunga awmlo lai te leh luhruk theihna hrang hrang awmte a hmuna enfiah turin Home Minister leh kan sawrkar thuneitute an ngen tih pawh sawiin, “Changtlung leh him zawka siam a nih theihna atan Central lam hotute pawh dawr turin kan ngen a ni,” tiin Group YMA hnenah hian thilpek an hlan bawk.