July 13, 2020 atangin Mizoram-a College hrang hrangte hawn theih beisei a ni

Hripui leng avanga Mizoram-a College hrang hrang khar mek chu boruak a danglam lohva, sawrkarin rem a tih chuan July ni 13, 2020-ah hawn tan beisei a ni.
Nimin khan Health & Family Welfare Minister Dr. R. Lalthangliana, Higher & Technical Education enkawltu ni bawk hovin a Pisa-ah hripui leng avanga College leh University khar mek, hawn leh hun tur leh Exam hrang hrang buatsaih hun tur chungchang sawiho niin Mizoram University Registrar, Prof. Lalnundanga leh Controller of Exams Prof. Lalnuntluanga te chuan University-in niminpiah-a Revised Academic Calendar tur MZU Vice Chancellor hova an duan leh rawt te chu chipchhiar takin an sawi a. Meeting chuan Under-Graduate leh Professional Course-a Semester hrang hrang Exam dan tur ruahmanna duan te, II leh IV Semester zirlaite III leh V Semester-a an kai chhoh dan tur UGC in thurawn a pek te thlir hoin Mizoram pawna awm mek zirlaite lo kir huna exam chungchanga harsatna awm thei te, zirna In tam tak Quarantine Center a hman mek a nih avanga harsatna awm thei te zau takin an sawiho a. Exam hun tur chungchangah chuan Final year te chu an kal zelna tur a khaihlak loh nan ngaihpawimawh hmasak ni se, an ti bawk.
Meeting chuan MZU ruahmanna chu tha an ti a. College hawn leh hun tur rawtna chu State Executive Committee, State Disaster Management Authority in an pawmpui turin SEC-ah thlen ni se tih an rel a. School Education Commissioner & Secretary, Esther Lalruatkimi chuan pawl 12 zirlai te chu College kai chho tur an nih avangin anmahni hmakhaw ngaia College tan hun tur ruat tha a tih thu a sawi. Ruahman dan chuan Ist Semester hi August ni 20 bawr velah tan beisei a ni.
Meeting chuan College tan ni a rawt chu hripui boruak thlir chungin he ruahmanna hi thlak theih a nih thu pawh an tarlang bawk a, Under Graduate (VI) (Final) Semester Exam leh Professional Course (LLB, BCA, MCA leh BBA) Even Semester 2020 (II/IV/VI/VIII) te chu July ni 20, 2020-ah leh Professional Course (B.Ed, M.Ed, M.Pharm(IV Sem tel loin), B. Pharm, B. Ed (Spl), B.Sc. (MLT), B. Optom, B.Sc. (RIT), BSW leh B.Sc. (Nursing)) Even Semester (II/IV/VI/VIII) te chu August ni 17, 2020-ah Exam tan nise tiin an ruahman a ni.
He hunah hian Mizoram pawn atangin hnamdang zirlai RIPANS-ah 300 bawr vel leh MZU-ah 500 bawr vel an awm thu tarlan niin heng hovin harsatna an tawh loh nan Exam hun hi ruahman anih thu MZU hotute chuan an sawi a. UGC Advisory chuan Intermediate Semester-te tan Exam buatsaih lova, an Internal Assessment leh Semester hmasa result-te a zatve a lain Semester an kai chhoh nan Grading siam a rawt a, mahse hemi chungchanga thutawp siam turin UGC chuan University-te hi thuneihna a pe a ni.

Comments

Chhiar Hlawhte