Chanchin thar thenkhat :

COVID-19 kai hmuh belh a ni

Nizan hmasa khan Mizoram-ah COVID-19 kai mi pakhat hmuhchhuah belh leh niin heti hian Mizoram-ah he hri kai enkawllai mi 13 an awm mek a ni. Mizoram sawrkar in thuchhuah siama a tarlan danin nizan hmasa khan COVID-19 positive case pakhat ZMC-a COVID-19 Testing Laboratory-ah hmuh belh a ni a. Tun tuma CO-VID-19 vei hmuhchhuah thar hi Delhi atanga May ni 31-a lo haw mipa kum 30 a upa, Aizawl a cheng a ni a, Khawsik a neih avangin Quarantine Centre atangin ZMC ah hian dahluh a ni a. A Swab Sample Test result a positive a ni. Heti hian Mizoram chhunga COVID-19 positive mek zat chu 13 a ni a, tunah hian Mizoram-ah CO-VID-19 kai enkawl dam mi pakhat awm tawhin tuna hri kai enkawllai te hi ZMC-ah dahluh vek an ni a, result nghah lai 250 an awm bawk.

Inbiakpawhna sawihona nei

Nimin khan Deputy Chief Minister, Tawnluia hovin a Pisa-ah Tuichang Bial leh Khawzawl District-a Telecom Service Providers- BSNL, Airtel, Reliance Jio leh Vodafone hotute thukhawmin Deputy Chief Minister chuan Telecom Service Provider te chu an hmalak tawhna ah lawmthu hrilhin, mipui rawngbawltu an nih tlanna ah tun aia service tha zawk Khawzawl District mipui ten an neih theih nan theihtawp chhuah turin a fuih bakah puih an ngaihna apiangah puih a in huam thu a hrilh a. Telecom Service Provider-te pawhin Power Supply lama harsatna an tawh dan leh development hnathawh avanga Fibre chat thin te sawiin, sawrkar nen awmze nei zawka thawhho an duh thu te an sawi bawk.

District 2-a Curfew kalpui

Tunlai hri leng mek laka mipuite an him theihna atana hmalakna atan Lawngtlai-ah chuan nimin-piah atanga tunkar Zirtawpni thleng awh turin Total Lockdown an kalpui mek a, hetiang bawk hian Siaha District-ah pawh nimin atang khan Total Lockdown hi kalpui niin hei hian naktuk thleng a awh dawn bawk a ni.

MPCC in sawrkar an ngen

Mizoram Pradesh Congress Committee (MP-CC) chuan hripui leng denchhena thilman sang chak lutuk control dan kawng a rang lama ngaih-tuah turin Mizoram sawrkar chu an ngen a, Mizoram a bungraw lo lut reng reng sawrkar in a rate uluk taka chhinchhiah a, mipuite hnena zawrhchhuah lehna tur rate thlenga a hriatpui a ngai an tih thu sawiin, a bikin Chawhmeh leh Sa chi hrang hrang man sang chak lutuk control tura rang taka hma la turin sawrkar chu an ngen bawk.

CM thusawi BJP in mak ti

BJP Mizoram Pradesh chuan June 2, 2020 a Chief Minister, Zoramthanga’n Thenzawl-a AH&Veterinary Department Complex a tlawh tuma a sawi, COVID-19 avanga intodelh a tuzia a hre thar chauh chu mak an tih thu leh, Mizoram Chief Minister hian tunhma khan Mizoram tan enge alo tih thin tih chu an zawhna a nih thu thuchhuah siamin an tarlang a, “Kan CM hi a phaw vuak-ah alo sapatal mai mai thin em ni tih chu kan zawhna lian tak a ni,” an ti bawk.