Vawiin-a Quarantine Facilities atanga chhuak turte ni 7 dang awm chhunzawm leh a ngai dawn

Health & Family Welfare Minister, Dr. R. Lalthangliana chuan Quarantine Facility a khunghran mek, Vawiin-a chhuak turte chu ni 7 dang an awm chhunzawm a tul thu a sawi.

Health Minister hian nimin tlai khan a Pisa-ah he thu hi sawiin, nimin-a Chief Minister hova inrawnkhawmna neihah nizan zanlai atangin Total Lockdown kar hnih (2) chhung atan puan a ni tih sawiin, Quarantine (inkhunghran) hun chhung ni 14 chu ni 21 thlenga pawhsei a nih bakah, hei hi hman nghal tura tih a nih avangin Quarantine Facility hrang hranga khunghran mek, Vawiin-a chhuak tura tih te pawh ni 7 dang an awm chhunzawm a ngai dawn tih a sawi a, Quarantine Facility atanga chhuak hlim te pawh In lamah uluk taka ni 7 chhung Self-Monitoring (uluk taka mahni invil) turin a chah a, chhungte nen pawh a intlawhpawh rihlo tur leh fimkhur taka awm turin a chah a, hemi chungchanga inkaihhruaina pawh a rang thei ang berin kimchang zawka tihchhuah a nih tur thu a sawi bawk.

Health Minister chuan mipuite, a bikin damlote chi-ai lo turin a chah a, Total Lockdown kalpui chhung hian Mizoram sawrkar hnuaia Doctor thawk zawng zawng ten anmahni thawhna hmun theuha an Office Phone number leh an mimal (private) Phone number ah mipuite leh a mamawhte tan engtiklai pawha rawn theihin an awm reng dawn tih a sawi a, Mizoram sawrkar hnuaia Doctor zawng zawngte chu damlohna leh harsatna nei an nih loh chuan anmahni post-ah theuh awm a, mipuite zawhna an dawn te hawihhawm taka lo dawngsawng turin a hriattir bawk a ni.

Health Minister Dr. R. Lalthangliana hian nimin-a COVID-19 chungchanga inrawn-khawmna neih ah tunhnai atang khan ZMC-ah ni khat-a sample 300 dawn endik theih a nih tak thu leh khawl tam zak hman thuai tum a nih thu a sawi a. Reilote ah RT-PCR khawl thar chah thlen thuai a nih tur thu sawiin, PCR khawl tlukpui, Trunat chu tunah hian Lunglei-ah pahnih hman theihin a awm tawh thu a sawi bawk a. Community Spread a awm loh nan theihtawp chhuah a tul thu a sawi bawk.