Serchhip Town-a VLTF tam zawk ten sawrkar hmun siam-a inkhunghranna an duhtawk lo

COVID-19 avanga inkhunghranna kal mekah Sawrkar in Mizoram pawn atanga rawn haw te ni 14 chhung inkhunghrang tura ruahmanna a siam leh chumi hnua chawlhkhar khat mahni inkhunghrang tura a tih chu Serchhip-a VLTF tam tak te chuan a him tawklo nia an hriat avangin a hrana inkhunghran dan tur an ruahman.

Mizoram sawrkar in hri leng mek kaihhnawiha tun thla ni 3-a ‘Quarantine chungchanga hriat turte’ a tihchhuah chu tunhnaiah Mizoram-ah COVID-19 kai hmuhchhuah an nih tak zel avangin Serchhip khawpui chhunga Village Level Task Force (VLTF) hrang hrangte chuan a him tawklo nia hriain an huamchhung ah inkhunghran dan tur ruahmanna an siam mek hlawm a, Serchhip-a VLTF tam ber te chuan inkhunghranna siam tur hian ruahmanna an siam fel tawh a ni.
Serchhip-I VLTF Chairman, Zohmangaiha Ralte chuan Quarantine Centre atanga rawn chhuak te hi ni 7 chhung khunghrang tura ruahmanna an siam thu sawiin, Mipa tan Zoluti Hall leh Hmeichhe tan VC Hall-ah inkhunghranna hi an buatsaih dawn thu a sawi a, ei leh in tur hi an chhungte tan inpek theih tura ruahman a nih thu a sawi bawk. Serchhip-II VLTF Chairman, T. Zadingliana pawhin inkhunghranna atanga rawn chhuak te ni 7 khung zuina tur hi an ruahman thu heng mite ei leh in tur pawh VLTF ten tum sak tura ruahman a nih thu a sawi a. Serchhip Dinthar Kohhran Hall chu Quarantine Centre atan hian an hmang dawn a, Inrinni khan hnatlang neiin Vawiin hian hman nghal an inbeisei thu an sawi bawk.
Serchhip-III VC Vice President, C. Lalhminghlua pawhin hetiang inkhunghranna siam tur hian an lo rel tawh thu leh tunhnai maiah rawn chhuak tur an la neih loh thu sawiin, tunkar-ah an rel fel dawn thu a sawi a. Serchhip-IV VLTF Chairman, Lalramnghaka Kawlni pawhin ni 7 inkhunghran leh chu tul an tih thu sawiin, amaherawh chu hmunhma hman tur an neih loh avangin an kalpui theih dawnloh thu leh Monitoring Team erawh indinin, mahni In lama an inkhunghran dan an enzui reng thu a sawi bawk.
Serchhip-V VLTF Chairman, Zoram-siama chuan tunkar tawp lamah chuan hetianga Quarantine Centre atanga rawn chhuak hi an neih dawn thu sawiin, nimin khan an In-ah tlawhkualin an inbuatsaih dan an thlirpui thu a sawi a. Hmunhma nei thalo leh him lo thei a  awm a nih chuan hma an lak zui tur thu a sawi bawk.
Serchhip-VI VLTF Chairman, H. Sai-chhinga pawhin Hmar Veng Primary School-ah emaw, Kohhran Hall-ah emaw inkhunghranna hi an siam tur thu sawiin, tunkar-ah ruahmanna siama an relfel tur thu a sawi bawk.
SerchhipVII VLTF Vice Chairman, Lalrinmawia chuan tun dinhmun ah hetianga ni 7 dang inkhunghranna siam leh tur hian ruahmanna engmah an la neih loh thu a sawi thung a. Serchhip-VIII VLTF Chairman, F. Lalhmangaiha chuan ni 7 dang inkhunghranna tur hi P&E Veng Primary School-ah an buatsaih dawn thu sawiin, Vawiin atang hian lut tur an awm nghal an beisei thu leh ei leh in erawh an chhungte pek tura an ruahman thu a sawi thung.
New Serchhip South VLTF chuan thuchhuah siamin ni 7 inkhunghranna hi an kalpui dawn thu leh, Peniel Kohhran Hall-ah inkhunghranna an siam thu an tarlang a. Hemi duh lova mahni In lama inkhunghrang duh tan chhungkua a ni 7 chhuak thei lova kharkhum theih zawk a nih thu an tarlang bawk. New Serchhip North VLTF Vice Chairman, RL. Chhuanawma chuan an area-ah chuan Quarantine Centre-a awm te Sample test result a chhuah hma loh chuan chhuah tir lo turin thuneitute hnenah thlen an tum thu a sawi a. Chhiahtlang VLTF te chuan Govt. P/S-ah inkhunghranna hi kar kalta a\ang khan ni 7 inkhunghran hi an kalpui \an tawh a ni.

Comments

Chhiar Hlawhte