Vawiin atangin Serchhip Bazar-a Dawr hrang hrang a inchhawka hawn a ni dawn

Serchhip Town chhungah inkharkhipna kalpui mek ni mah se Vawiin atang hian Serchhip Bazar-a Dawr hrang hrang te chu Vawiin atang hian a inchhawka hawn leh tum a ni a, amaherawh chu Serchhip Bazar building erawh sawrkar laipui in Inkharkhip kaihhruaina a siam ah hawn theih ala nih loh avangin hawn a ni dawnlo thung.

Serchhip-IV VLTF hruaitute hnen atanga thu kan dawn danin Inkharkhip kalpui mekah Serchhip Bazar-a mipuite mamawh zuartu dawr tam tak hawn theih ala nih loh avang hian nimin khan Serchhip-IV VLTF hruaitute chuan Serchhip District Deputy Commissioner leh DC Office-a Officer dangte kawmin Dawr inhawn chungchang hi an sawipui a, hemi hnua ruahmanna an siam danin Vawiin atang hian Serchhip Bazar-a dawr hrang hrangte chu a inchhawka hawn theih a ni dawn a, hei hian damdawi zawrhna Dawr chiah a huam dawn lo a ni. Hetianga dawr hawn dan tur ruahmanna siam thar a nih tak avang hian damdawi zawrhna tihloh dawr zawng zawngte chu A leh B-ah then leh vek a ni dawn a, Vawiin-ah A zawng hi inhawngin naktuk-ah B te an inhawng ve leh dawn a, hetiang hian A leh B chhinchhiahna nei te chu a inchhawka inhawng zelin Dawr pakhat hi a ni zawn-a inhawn phal a ni lovang.
Dawr hawn theih tur ni tawh mah se Dawr zawng zawngte chu anmahni dawrtute dawr chhungah an luh lohna turin an Dawr kawt-ah hrui thlung vek tura hriattir an ni a, hei bakah hian anmahni dawrtute zawng zawng pawh chhin-chhiahna mumal tak nei tura hriattir niin hei hi mipui ah hri leng a awm palh hlauh pawha inchhui-chhuahna tura ruahman a ni.
Hetihlai hian Serchhip Election Officer, Vanlalhmachhuana chuan nimin vek khan Ser-chhip-a VC thenkhat te pawh kawmin Dawr in hawn chungchang hi a sawipui bawk a, VC hrang hrangte chu anmahni remchan dan anga hma la tura tih an ni a, Serchhip khawpui chhunga dawr tamna dang, Serchhip AOC Veng huamtu Ser-chhip-VII VLTF te chu nizan khan thukhawmin hemi chungchang hi an sawiho rin a ni a,  College peng vel huamtu New Serchhip North VLTF te erawh chuan zing dar 6:00 atanga zing dar 10:00 thleng Dawr inhawn an phalsak thung a ni.

Comments

Chhiar Hlawhte