Serchhip-a Cold Storage hman theih dawn hnai

Serchhip Sailiamkawn-a Cold Storage chu hman theih tura buaipui mek niin tunah hian Electric pekna siamfel a ni tawh a, hun reilote ah Trail Run neih theih beisei a ni.

Horticulture Department te enkawl, Serchhip Sailiamkawn-a Cold Storage thuamthat hna thawh hi zawhfel thawkhat a ni tawh a, Zirtawpni kalta khan Serchhip-a P&E Department chuan he khawl tihnunna tura Power pekna tur hna an thawh chu zofelin tunah chuan tihnun theih a ni tawh a, he khawl tihnunna atana hman tur hian Electric Transformer thar chu bun niin a hmaa lo bun tawh leh kum 10 vel zet hman loha lo awm tawh chu thlak a ni a. Cold Storage atana Electric pekna tur hmanraw mamawh leina tur sum hi Horticulture Department chuan June 11, 2020 khan P&E Department kutah an hlan a, chak taka hmalak zui niin tunah chuan peihfel a ni ta a ni.

Serchhip DHO, M. Vanlalzami chuan Cold Storage-a Electric Connection tihfel a nih hnu hian Temperature Control dan rawn zirtir turin mithiam an rawn kal beisei a nih thu leh chumi hnuah chuan Trail Run pawh kalpui theih beisei anih thu a sawi bawk a, helai hmunah hian thlai thar MT 90 zet vawnthat theih tura ruahman a ni.

Mizoram-a inkharkhipna kalpui a nih hnu, May 1, 2020-a Chief Minister, Zoramthanga hova Vegetables and Fruits Supply Chain chungchanga hmalakna te thlirhona neih khan Serchhip-a Cold Storage sak zawh tawh hi tih nun thuai turin an rel a ni.