Lirnghing in Mizoram a sawi; Chhiatna tenau thleng a awm nual

Darkar 12 chhungin Mizoram-ah tum hnih lir nghingin nimin zing khawvar hmaa lirnghing vangin Mizoram chhungah chhiatna tenau thleng a awm nual a, hriat theih chinah Mizoram in lirnghing avanga chhiatna a tawrh nasat ber zing ami a ni.
Niminpiah Pathianni tlai dar 4:16 khan Mizoram chu lirnghing, magnitude 5.1-a na in a sawi a, he lirnghing hi Darlawn chhimchhak km 24-a hla, leihnuai KM 40 leh meter 200 a thuk atanga rawn nghing tan a ni a, a nat zawng hi a tehna ah magnitude 5.1 a ni. Mizoram hmun hrang hrang, hmar chhak lama a nghinna huamchhung hmun hrang hrang ah lir hi rei vaklo a nghing a, chhiatna thleng erawh vanneih thlak takin hriat tur a awm lo.
He lirnghing a thlen atanga darkar 12 vel a liam hnu, nimin zing dar 4:11 khan magnitude 5.8-a na in lir hi a nghing leh a, lirnghing hi Khawbung ram chhung lei hnuai KM 8.9 a thuk atanga intan a ni a, Myanmar, India leh Bangladesh te a sawi a, US Geological Survey-in lirnghing intanna nia an tarlan chu Khawbung ram – Vawmkhum leh Eklung lui infinna bul, Tumthangmual thlen hma kawrte-ah a ni a, lirnghing intanna hi KM 8.9 leka thuk a nih avangin a sawi na hle a, Second 3.7 chhung chauh a nghin avangin chhiatna lian tham a thlen lo hlauh a ni.
He lirnghing avang hian Khawbung-ah mimal chenna In, F. Lalrempuia In concrete ban kil khat a sâwp a, B. Laluapa In hnuai leirawhchan rem la plaster loh ban kar khat leh a chhung bang rem a chim a, C. Lalrinsanga In bang a kil tan zawngin a khi tlang a, heng bakah hian In 7 vel chu nasa lutuk lovin a khi bawk a. Hlakungpui Dormitory sak mek bang pawh engemaw zat chhiain khi a awm nual bawk. Zokhawthar-ah pawh mimal In 10 chuang chu bang leh beam vel khi chat a awm a, Zokhawthar Presbyterian Kohhran Biak In pawh lirnghing vang hian a chhe nual a, a chunglam chim awmin biak In chhung a dengchhe nual bawk. Khuangleng-ah mimal In bang chim pakhat leh Concrete In bang khi a awm nual a. Community Hall chhûng chung zâr (ceiling) a chhe bawk a ni. Khuangthing-ah pawh lirnghing vang hian Biak In chhûng chung zâr, Pulpit chung ami tlem azawng a keh a. Vaphai-ah mimal In hnuai siam mek leirawhchan an rem chu a chim a, lei khi chat a awm bawk a ni. |hasiama Se no neihna tlang chhim lama awipanga lung khawsa engemaw zat pawh lumin Chawngtui ‘E’ panna kawng pawh lunglum in a hnawh a, Farkawn leh Khankawn-ah pawh chhiatna tenau thleng a awm bawk.
Serchhip District chhung Lungkawlh khuaa Laldawli In-a brick rem thenkhat pawh lir-nghing vang hian chhiain Lungkawlh YMA Run bang thenkhat a khi bawk a, Biate leh Leithum khua ah te pawh chhiatna tenau a awm nia thudawn a ni bawk.

Comments

Chhiar Hlawhte