Thenzawl Goat Breeding Farm-a hmalak dan Chief Minister in a hmunah a enpui

Chief Minister, Zoramthanga chuan nimin khan Thenzawl tlawhin AH&Vety Department in Kel an vulhna te a enpui.

Hemi puala inkhawm tawi Thenzawl Farm Veng Rest House tual-a neih ah Chief Minister, Zoramthanga chuan Hripui leng leh a do kan buaipui mek tih sawiin, hetih lai hian buh leh thlai bakah Sa-a intodelh tura nasa taka tanlak a nih thu a sawi a. Hei bakah hian hri leng karah kawngpui siam ah Project lian pui pui kalpui theih ni lo mah se khaw kar kawng tha ngaih pawimawh a nih thu leh sawrkar in theihtawp a chhuah thu sawiin, harsatna leh manganna period ni mah se ei leh bar, sa-a intodelh tura tan lakna hun a nih thu Mizo mipui ten kan hriat a tul thu a sawi bawk. Chief Minister chuan Burma leh thenawm State thenkhat atangin Sa- Bawng leh Vawk leh kan chawlut tih sawiin, ran hri len chang a awm thu leh hei hian kan Economy a tihchhiat thin thu a sawi a. Hei vang hian ran chaw chinna atana boruak tha awmna Mizoram-ah Sa-a intodelh tura theihtawp chhuah a tul thu sawiin, chutiang tur chuan sawrkar pawhin theihtawp a chhuah thu leh buh leh thlai tharchhuahna kawngah pawh tunlai thiamna leh khawl hmang tangkaia Buh-a intodelh chu an tum a nih thu a sawi bawk.

He hun kaihruaitu AH&Vety Minister, Dr. K. Beichhua chuan Thenzawl-a Vety Department hmalakna hrang hrang sawiin, ran chaw chinna, Varak leh Ar vulhna leh Amusement Park & Livestock Based Eco-Tourism changtlung tak kalpui mek anih thu leh Kel vulhna kalpui mek anih dan a sawi a. Chief Minister tanpuinaa hmasawnna nasa zawk Mizoram tan a thlen a beisei thu sawiin, tunlaia Mizoram Sawrkar in hmasawnna tura a hmalakna hrang hrang te chu Mizoram Sawrkar Flagship Programme, Socio-Economic Development Programme (SEDP) hnuaia hmalakna vek anih thu a sawi bawk.

Thenzawl-a Goat Breeding Farm hi NABARD-RIDF atanga sum hmuh hmanga siam niin nikum (2019) April thla khan Rajasthan atangin Kel chi tha chi 83 an lalut a, kumin May 26 khan Rajasthan atang bawkin Kel chi tha chi 97 lalut lehin, tun dinhmunah hian Kel 180 vulh mek a ni.