COVID-19 avanga inrawnkhawmna neih a ni

Nimin khan SAD Conference Hall, Aizawl-ah sawrkar mi pawimawh ten COVID-19 in Mizoram a chenchilh mek chungchangah inrawnkhawmna an nei.
He inrawnkhawmna ah hian Health Minister, Dr. R. Lalthangliana chuan Mizoram-ah COVID-19 kai hmuhchhuah thar an awm thu leh mipuiten kan dawnsawn dan thlirin kan la hrethiam tawklo nia a lan thu sawiin, mipui tan hlauhthawn tur a awmloh thu a sawi a. Home Minister Lalchamliana pawhin COVID-19 nena kan chen dun loh theihloh tawh avangin thiam taka chen dun pui kan zir a ngai tawh tih sawiin, Supply Minister K. Lalrinliana pawhin Bairabi a buhfai load leh unload tu labour te pawh thinhrik leh sawithaih an nih thu leh hei hian harsatna engemaw chen a siam thu a sawi a. I&PR Minister, Lalruatkima pawhin COVID-19 chungchangah thuthar a awmin sawrkar ruahmanna ngaichang lova Social Media-ah thu thehdarh nghal zung zung a ni thin chuan buaina a thlen fo thin thu sawiin, mipui ti chi-ai leh rilru tibuailo thei tur zawnga Social Media hmang turin mitinte a ngen bawk.
He hunah hian COVID-19 Swab Sample endikna khawl RT-PCR pali (4) neih thuai beisei a nih thu tarlan a ni a, Viral Transport Media (VTM) 2550 neih a nih thu leh reilote ah 10,000 chah thlen beisei a nih thu tarlan ani bawk. Zoram Medical College-ah ICU khum 36 (makeshift ICU telin) leh Ventilator 16 neih a nih thu leh, Isolation Ward khum 28 awmna ruahman a nih thu tarlan niin COVID-19 vei zawng zawng ten ICU leh Ventilator an mamawh vek ngai lova, tun dinhmunah chuan inpuahchahna a tha tawk rih nia a lan thu tarlan a ni bawk.

Comments

Chhiar Hlawhte