State pawn atanga rawn haw hmeichhe 8 ten an Test result hriat phutin chawng an nghei

State pawn atanga rawn haw, BCM Ramthar Lunglei-a hmunhma-a khunghran mek hmeichhia 8 te chuan an Throat Swab Sample test result hriat thuai phutin nimin zing atang khan chaw an nghei a, sawrkar thuneitute chuan nimin veki khan tlawhin thil awmdan an hrilhfiah nghal bawk.

Thudawn danin BCM Ramthar Lunglei-a Quarantine Centre-a awmte hian May 31, 2020 khan Mizoram rawn thlengin JNV Pukpui-ah an Throat Swab Sample lak sak an ni a. June 1, 2020-ah BCM Ramthar Quarantine Centre-ah hian dahluh niin Room khatah Hmeichhia 10 awmin Bathroom 3 an inhmantawm a. An Sample enfiah result hi June 4 khan chhuakin an zinga pakhat chuan COVID-19 a kai tih hmuhchhuah niin Pukpui-a Covid Care Centre-ah lak nghal a nih bakah June 6 khan an Sample hi lak nawn leh a ni a, hemi result hi tun thlengin a hre thei ta lova, an dinhmun dik tak hriatchhuah vat a nih theih nana thuneitute nawr nan nimin zing atang khan chaw hi an nghei ta a ni.
Nimin vek khan he Centre hi Lunglei Chief Medical Officer hovin SMO leh SDPO te chuan tlawh nghalin Duty Incharge te nen an inkawm bakah aurinna hmangin thil awmdan an hrilhfiah nghal a, nimin vek khan an result te hi hriat theih beisei a nih thu hrihin, helai hmuna awm te erawh chuan an result hi an hriat hma chuan chawnghei hi chhunzawm zel an tum thu an sawi a, nimin tlai thleng khan chaw hi an la nghei a ni.
Hetihlai hian Lunglei District Congress Committee (LDCC) chuan nimin khan thuchhuah siamin Lunglei Ramthar Veng, Lunglei HPC Vice Chairman, Lawmawma Tochhawng In bul lawka BCM Biak In-a Quarantine-a dah mek hmeichhe 8 ten chawnghei hial ngaia Sawrkar nawr a lo ngai ta chu Sawrkar chaklohna liau liau niin an sawi a, “Tlabung leh Haulawng lamah te pawh Quarantine a awm mek; Course zo tawh, mahse Swab Sample result hre thei lo rilru pang-khing tak tak an awm a, District dangah pawh an awm teuh a rinawm,” an ti a. Hri leng dona ah Sawrkar Official, Force, Local/VLTF, Medical lam a thawkte chuan rimtak leh taima takin hna an thawh laiin hnathawhna hmanrua tha pe hleithei lo sawrkar kan hrawn niin an thuchhuah ah chuan an tarlang bawk.

Comments

Chhiar Hlawhte