Serchhip District-ah Sample 385 la tawh; Inkhunghrang mi 353 an awm mek thung

Nimin thleng khan Serchhip District-ah COVID-19 avangin mi 385 te Sample lakkhawm ni tawhin mi 190 te result hriat a ni tawh a, tunah hian result nghah mek 167 an awm a. Hetihlai hian Serchhip District chhunga inkhunghranna hmun hrang hranga inkhunghrang mi 353 an awm mek bawk.

Serchhip CMO Office atanga thu kan dawn danin COVID-19 hri leng mek avang hian Serchhip District atang hian mi 385 te Throat Swab Sample chu enfiah tura lakkhawm ni tawhin heng zinga 357 te chu ZMC Laboratory-ah thawn a ni tawh a, heng atang hian mi 190 te result chu dawn ni tawhin an zingah hian COVID-19 hri kai hmuhchhuah mi pakhat a awm tawh a, ani hi ZMC-ah enkawl tura thawn ni tawhin tunah hian mi 167 te Sample result ngaihchan mek niin nizan lam khan result thenkhat chu hriat leh theih beisei a ni.

Serchhip CMO Office-a thawktute chuan tunah hian mi 28 te Sample la thawn loh a awm thu sawiin, heng te hi nimin mai-a lakkhawm te niin tunah hian rawn thleng thar leh Sample lak leh mai tur an awm thu an sawi a, heng mite Sample lak fel a nih veleh hian enfiah tura thawn leh nghal a ni dawn a ni.

Tun dinhmun ah Serchhip District chhungah inkhunghrang mek pawh mi 353 an awm thu sawiin Serchhip CMO Office-a thawkte chuan heng te hi mahni In lama inkhunghrang mi 32, Sawrkar hmunhma inkhunghranna hmuna inkhunghrang mi 183, Vantlang leh Kohhran hmunhma a inkhunghrang mi 133 leh Isolation-a dah mi 5 an nih thu sawiin, heng inkhunghrang zingah hian Throat Swab Sample Test result hriat loh avanga inkhunghranna hmun chhuahsan theihlo mi pakhat a awm thu leh hei pawh hi mahni In lama inkhunghrang a nih thu an sawi bawk.

Hei bakah hin tunkar chhungin Quarantine Centre chhuahsan tur engemaw zat an awm thu leh heng chhuak tur hnaivai te hi an Throat Swab Sample Test-a Negative te vek an nih thu an sawi a, amaherawh chu heng mite pawh hi an chhuah RAT hmanga enfiah leh vek an nih dawn thu leh RAT-a Reactive an awm a nih chuan an Sample hi lak nawn leh vek a nih dawn thu an sawi bawk a ni.

Serchhip-a AYUSH Doctor te chuan tunlai hian mipuite hnenah Homoeopathy damdawi, Arsenicum Album 30 chu an semchhuah mek thu pawh sawiin, he damdawi hi mihring taksa a natna lo do tu tihchakna a nih thu an sawi a. A mamawhte tan Serchhip Medical Complex-a AYUSH OPD (Tuizemdum kawn)-ah Doctor te rawn theih reng a nih thu leh hei bakah hian natna dang neite tan pawh AYUSH damdawi hrang hrang an kawl reng thu an sawi bawk.