Serchhip-a YMA Branch hrang hrang ten YMA Day vawi 85-na pualin hun an hmang

Nimin June 15, 2020 kha Mizoram-a tlawmngai pawl lian ber, YMA dinchampha YMA Day vawi 85-na a ni a. Rampumah inkharkhipna kalpui mek a nih avangin a huhova inkhawm neia hun hmang an awm meuh lova, Serchhip khaw chhunga Branch hrang hrang ten midangte tanpuina leh thil tha tihna hun atan an hmang a ni.

Rampum-ah inkharkhipna kalpui mek a nih avangin kumin hian YMA Day-ah hian YMA member punkhawm luai luaina tur leh Vantlang inkhawm te nei-a hun hmang hi Serchhip Town chhungah an awm lova. Serchhip Sub-Hqrs. YMA chuan Serchhip khawpui chhunga Damdawi In, Home leh Centre hrang hrang te tlawhin YMA Day thilpek an hlan a ni. Serchhip Town chhunga YMA Branch zingah Serchhip Darnam Branch, Serchhip Saron Branch leh Chhiahtlang Hmar Veng Branch YMA tihloh chuan YMA Day pual hian hun an hmang theuh a ni.
Serchhip Dinthar Branch YMA chuan zingkar-ah YMA Library-ah Flag zarin YMA Executive Member kalkhawm ten hunserh hmangin an huamchhunga damlo mi pakhat Rs. 1000/- in an kan a. Serchhip Chhim Veng Branch YMA chuan YMA Flag zarin chhungkaw tin ten mahni In leh a vel thenfai hna an thawk a, YMA Information Mike hmangin YMA kumpuan thuchah sawiin, chhungkaw 2 te pawisafai in an tanpui bawk.
Serchhip Field Veng Branch YMA chuan an YMA Hall-a Flag zarin Serchhip Hmar Veng Branch YMA pawhin YMA Hall leh YMA In-ah te YMA Flag an zar a, Serchhip Kawnpui North Branch chuan YMA Flag zarin an Veng Whatsapp Group kaltlangin YMA kumpuan, Zirna Uar tih chungchang zirtirna an siam a, P&E Veng Branch YMA te pawhin zingkar hnatlang neiin YMA Hall leh a bulvel an thianfai bawk.
Serchhip Vengchung Branch YMA chuan Zoluti Hall-ah YMA Flag zarin OB leh Sanitation Committee ten YMA bungrua tihfai hna-tlang an nei a, Serchhip Chanmari Branch YMA chuan zingkar-ah YMA Flag tarin YMA Information Mike hmangin YMA Kumpuan, Zirna Uar tih hmangin thuchah an sawi a, Serchhip khawpui chhunga Community Quarantine Centre pathum (3) ah chhun thingpui hmeh an sem bawk. Serchhip Kawnpui South Branch YMA chuan Bazar-ah YMA Flag zarin Vengchhung a chhungkaw tin te chu an huamchhung thenfai hna thawk tura ngenin, an bawlhhlawh te chu Motor hmangin an lakkhawm sak bawk a ni.
Chhekhnai Branch YMA chuan damlo mi 9 te Rs. 1000/- theuha kanin an huamchhunga NH. 54 kawngdung cheina atan thingtiak 20 an phun a, Kuang siam hnatlang an nei nghal a. 
New Serchhip Venglai Branch YMA chuan YMA Hall-ah hnatlang neiin Zoar Deprived Children Home ah buhfai leh chawhmeh an hlan a, New Serchhip Bazar Branch YMA ten an huamchhunga chhungkaw 4 bakah Home 2 leh Mercy Hospital-ah thilpek hlanin chhun lamah an huamchhunga an thingphun te enkawl hna thawkin thingtiak an phun belh bawk. New Serchhip North Branch YMA te pawhin zingkar-ah YMA Flag zarin hunserh an hmang bawk.
Bukpui Branch YMA te chuan YMA Day pual hian Thlanmual kawng samfai hnatlang an nei a, Chhiahtlang Chanmari Branch YMA ten chhungkaw pahnih te thilpek hlanin Chhiah-tlang Chhim Veng Branch YMA ten Duty Post-ah YMA Flag te zarin YMA Information Mike hmangin YMA kumpuan thuchah an sawi a, chhun lamah OB ten hnatlang an nei bawk. Chhiahtlang Zotuithiang Branch ten Thlanmual samfai hnatlang an nei bawk a, Chhiahtlang Kawn Veng Branch YMA te chuan boulder lain NH. 54 kawng khuar zual hnawhin an hnatlang a, Chhun lamah Kuang siam hnatlang neiin Serchhip Damdawi In-ah Kuang pakhat an pe a, an huamchhunga chhungkaw 12 te thilpek, pawisafai an pek bakah COVID-19 dona atan CM Relief Fund-ah Rs. 5000/- an chhunglut bawk.

Comments

Chhiar Hlawhte