Sample thawn 355 zingah 188 result hre tawh

Serchhip District-ah COVID-19 avangin mi 355 te Sample chu enfiah tura thawn a ni tawh a, hetihlai hian Sawrkar in Quarantine Centre-a awm te inkhunghran hun a pawhsei avangin Sample Test result nghah avanga Quarantine Centre chhuahsan theilo erawh an awmlo.
Serchhip CMO Office atanga thu kan dawn danin COVID-19 hri leng mek avang hian Mizoram State pawn atanga Serchhip District-a rawn haw te Sample chu enfiah turin ZMC-ah thawn zel a ni a, nimin thlengin Sample 355 thawn ni tawhin heng atang hian 188 te chu result hriat ni tawhin Positive hmuh-chhuah mi pakhat a awm a, hei hi ZMC-ah thawn niin, tunah hian mi 167 te result chu ngaih-chan mek a ni.
Tun dinhmun ah State pawn atanga a huho-a Serchhip District-a rawn haw te chu an Sample lak kim a ni tawh a, mahni a rawn haw, khunghranna hmuna awm mek te Sample pawh lakkhawm hna thawh chhunzawm zel niin a rem-chan anga thawn nghal zel an ni ang.
Hetihlai hian tunhnaia Chennai atanga Serchhip District-a rawn haw mi 36 te pawh RAT hmanga enfiah leh vek niin an vai hian an Negative vek a, an rawn hawna a rei tawh avangin PCR Test neih ngailo tura ngaih an ni thung.
Serchhip CMO Office-a thawktute chuan tunhnaiah sawrkar in Quarantine Centre-a awm te inkhunghran theih hun ni 14 ni thin, ni 21-ah a rawn pawhsei tak avangin Serchhip District chhung Quarantine Centre hrang hranga awm zingah Sample Test result chhuah loh avanga Quarantine Centre chuahsan theilo an awmlo tih an sawi a. Tun dinhmunah Serchhip District-ah hian inkhunghrang mi 403 an awm mek a, heng mite hi mahni In lama inkhunghrang mi 87, Sawrkar hmunhma-a inkhunghranna hmuna khunghran mi 183 leh Vantlang leh Kohhran hmun-hma inkhunghranna hmuna inkhunghrang mi 128 bakah Isolation-ah dah mi 5 te an ni.

Comments

Chhiar Hlawhte