Serchhip mipuiin inkharkhip an zawm tha nghal: Bawrhsap in inkaihhruaina a tichhuak

Mizoram sawrkar in ruahmanna a siam angin nizan hmasa zanlai dar 12:00 atang khan Mizoram pumah khauh zawka inkharkhipna, Total Lockdown chu kalpui a ni leh ta a, Serchhip District-ah pawh he inkharkhipna khauh zawk hi kalpui ve nghal a ni.

Chief Minister, Zoramthanga hova sawrkar hotute leh pawl hrang hrang kalkhawm in an rel angin nizan hmasa zanlai dar 12:00 atang khan Mizoram-ah Total Lockdown hi kalpui a ni a, hemi chungchangah hian Serchhip District Deputy Commissioner, Dr. Lalzirmawia Chhangte chuan nimin khan thuchhuah siamin Mizoram sawrkar chuan COVID-19 laka mipuite kan him theihna turin inkhrkhip (Total Lockdown) chu nimin, June 9, 2020 atanga chhiara ni 14 chhung kalpui a nih tur thu thupek a chhuah tih a tarlang a. He thupek leh inkaihhruaina State sawrkar in a chhuah hi Serchhip District-ah hman nghal vek tur a nih thu leh sawrkar Order behchhana Serchhip District tan bik inkaihhruaina siam a nih hma chuan State sawrkar thuchhuah hi ti danglam lovin chhuah a nih anga zawm tur a nih thu a tarlang bawk.

Serchhip District Bawrhsap, Dr. Lalzirmawia Chhangte hian nimin vek khan Serchhip Town leh Thenzawl-a Total Lockdown kalpui dan tur hriattirna tichhuak nghalin Serchhip District mi leh sa, lockdown avanga State pawna tangkhang lo haw turte chu Deputy Commissioner, Serchhip hnenah an in report vek tur a ni a, Serchhip Town Area leh Thenzawl atanga bungraw thiarchhuak emaw, la lut tur emaw te chuan DC emaw, SDO (Civil) Thenzawl hnen atangin phalna an la tur a ni a, Essential Commodities phur tur tan erawh phalna hranpa a ngai lovang.

Serchhip leh Thenzawl-a nitin mamawh (Essential Commodities) zawrhna dawr te, eichawp dawr (wholesale leh retail), Veng tina dawr te, Supply Retailer (Fair Price Shop), mihring leh ran damdawi dawr leh Clinic, thlai chi leh leitha zawrhna, kut hnathawktu te hmanraw zawrhna, ranchaw zawrhna leh bungraw phur mamawh Oil leh Spare Parts zawrhna dawr te chu VLTF te ruahmanna siam angin hawn theih a ni anga. Mimal eizawnna hna (Cottage & Home Based Industrial Units) Puanthui, Puantah, Carpentry, Fabrication, Bakery leh a dangte chu phalna hranpa lak ngai lovin kalpui theih niin Hnathawktu ten Social Distancing dan zawm chungin hna an thawk tur a ni a, hnathawhna hmunah hian mi 5 (panga) aia tam awmkhawm phal ni lovin mipuiiin awlsam zawka Sa, Thlai leh chawhmeh an hmuh theih nan veng hrang hrangah VLTF ten ruahmanna an siam ang.

Inneih inkhawm leh mitthi vuina-ah mi 35 aia tam punkhawm khap niin Kohhran leh khaw-tlang hruaitute'n khauh taka kalpui tura beisei a ni a. Serchhip Town Area leh Thenzawl atanga luh leh chhuah (zin veivah) khap niin tul bik thil leh Emergency a veivah ngai te chuan VLTF te kaltlangin DC/SDO (C) phalna lak tur a ni a, District pawna veivah ngai te tan mCOVID-19 mobile application-ah mPASS hmangin dilna siam tur a ni a, he dilna hi VLTF ten an hriatpui ngei tur a ni.

Serchhip leh Thenzawl-ah hian mahni In leh compound chhuahsan khap niin, lirthei hmanga mipui chetvel pawh khap tlat a ni a. Commercial Vehicles (Maxi Cab, Taxi, Auto Rickshaw, Pik-up etc) te pawh tlanchhuah phal a ni lova, heng te hian phalna pek te a huamlo thung ang.

VLTF te chu mahni Veng theuh ah duty tur niin vawi khat ah mi panga (5) aia tam Duty tur niin kum 60 aia upa te duty loh tur a ni a. Feh leh ramkal tur tan phalna lak ngaiin lirthei a kal turte pawh an permit-ah driver leh Motor No. tarlan tur a ni a, chhiatrupna thlen hlauhawm avanga Insak chhunzawm leh hnathawh chhun-zawm ngai te chu VLTF te hriatpuina leh remtihna in hna chhunzawm theih dawn bawk a. Essential Commodities zuartute chuan an thil zawrh rate an tarlan vek a ngai dawn bawk a ni.