Nizan zanlai atangin Mizoram pumah khauh zawka inkharkhipna kalpui tan leh a ni

Nimin khan Chief Minister, Zoramthanga hovin Aizawl-a Assembly Annexe Conference Hall-a COVID-19 chungchanga inrawnkhawmna neih niin COVID-19 hrileng a darh zau zel loh nan Mizoram-ah chawlhkar hnih (2) chhung inkharkhipna khauh lehzual (Total Lockdown) neih rel a ni a, nizan zanlai atang khan inkharkhipna khauh lehzual hi kalpui nghal a ni.
He inrawnkhawmna ah hian Chief Minister, Zoramthanga chuan COVID hripui chuan Mizoram rawn run in, tunah pawh vei mek mi 41 hmuh an nih tawh thu sawiin, theih ang tawpin kan State a him theih nan sawrkar chuan hma la in, rampum lockdown kalpui hma in kan State-ah kan lo tih hmasak tawh thu a sawi a. COVID-19 dona atan chuan pawisa tam lo chung chung pawhin mamawh leina tur dilna lut reng reng a hnawl ngailoh thu leh a tih tlem (cut down) ngaih loh thu a sawi a, mamawh dang a awm pawhin inthlahrung lo tur a chahin, neih chhun ang ang hman a nih tur thu a sawi bawk.
Natna kan hriat lawk loh leh hmelhriat ngai miahlo laka fihlim turin thiam ang tawka sawrkarin hma a lak thin thu Chief Minister chuan sawiin, tuna kan Mizoram dinhmun thlir hian kan him tlan theih nan Total Lockdown neih rawtna chu tha a tih thu a sawi a. Thla thum (3) chhung hah takin Task Force leh Duty dangte lo thawh tawhna ah lawmthu sawiin Chief Minister chuan, an inpekna chu chhuanawm a tih thu a sawi a. Tun Total Lockdown kan kalpui leh mek turah hian tlawmngai-a theihtawp lo chhuah leh hram tura a ngen bakah him tura hmalakna chu a thlawn mai loh nan mipui kan fimkhur tlan a tul thu a sawi bawk.
Total Lockdown hi khawpuiah chuan khauh taka kalpui a ngaih chhan awm mahse thingtlang khaw thenkhatah chuan nunphung pangngai deuhthaw a kal a pawiloh theih avangin, State pum a angkhat a khuahkhirhna kalpui vek a tulloh thu leh, hemi atan hian Veng/Khua leh area a zirin kaihhruaina siam rel a ni a. Hemi hun chhung hian mipui tan phurrit lutuk a awm loh nan mamawh leina hun tur leh dawr hawn dan tur pawh fel taka ruahman a ni anga. Total Lockdown kaihhruaina chu State Executive Committee, Mizoram State Disaster Management Authority in a chhuah dawn a ni. 
Tuna Quarantine hun chhung ni 14 kalpui mek chu ni 21 ah pawhsei a ni dawn bawk a. Lockdown kalpui chhung hian State pawn atanga tangkhang lo haw te a tam thei ang ber leh chak thei ang berin PCR test tih a ni ang a. Home Quarantine chu damlo leh a tul bik thenkhat tan lo chuan tih loh hram ni se tiin rel a ni bawk.
He inrawnkhawmnaah hian Mizoram-a COVID-19 positive te chu thalai lam zel ni mah se ram dang nen a inkhaikhin chuan ‘Vulnerable Group’ an tih, natna hrang hrang Cancer, BP sang, HIV positive leh adangte kan tam avangin ramdanga an dampui mai thin kha keini State-ah chuan a hlauhthawnawm theih avangin van-tlang-a kan inkaidarh loh nan a vei mek awm thei turte zawnchhuah thuai theih nan leh chumi chhunga inkaidarh a awm loh nan Total Lockdown kalpui a tul thu an sawi a. Chennai atanga lo haw, Quarantine Period zo tawh te pawh PCR Test tiin tunah hian hmalak mek a nih thu tarlan a ni bawk.
He hunah hian Chief Secretary, Lalnun-mawia Chuaungo chuan kan him tlan nan sawrkar in theihtawp a chhuah thu a sawi a. Temporary ILP pek chungchangah zau taka Mizoram lo lut duh apiang hnenah pek a nih loh tur thu a sawi a. Sawrkarin a bik taka a mamawh, lo kal ngei ngei ngai, entirnan khawl rawn siam tur te emaw, Home Department in phalna a pek tawh te tana ILP issue thei tur a ruat mai a ni, a ti a. Heng ILP Issuing Authority a ruat te hian an duh thuin ILP an pechhuak theilo tih a sawi bawk.

Comments

Chhiar Hlawhte