Lockdown kalpui dan tur sawiho niin VLTF te Hrui pawt-a Duty turin beisei an ni

Nimin tlai khan Serchhip District Level Task Force on COVID-19 chu an Chairman, Dr. Lalzirmawia Chhangte hova thukhawmin Total Lockdown kalpui zel dan tur leh VLTF te hmalak dan turte an sawiho.
Serchhip DC’s Conference Hall-a he thutkhawm-ah hian District Bawrhsap ni bawk, Dr. Lalzirmawia Chhangte chuan kan dinhmun zirchiangin mithiamte rawn chungin sawrkar chuan Hapta hnih chhung awh tur Total Lockdown a puang tih sawiin, hei hi kan zavaia himna tur thil a nih hriain mitinin tha taka kan zawm theuh a tul a ni, a ti a. Police leh VLTF te an pawimawh hle dawn tih sawiin, thahnem ngai taka thawk chhuak zui zel turin a sawm a. Mipui tichiai thei zeldin thubawl mai mai thehdarh kawnga fimkhur tura mitin te ngenin, sawrkar hnathawkte phei chuan chutiang thil engmah an ti thianglo tih inhre thar turin a chah a, mipui thlabar thlamuana hnemtu tur zawk kan ni tih inhre tura a chah bakah khaw hrang hrang ten khunghran mekte tan thilpek an pek nasat avangin lawmthu a sawi bawk.
He Meeting-ah hian Village Level Task Force (VLTF) te hmalak dan tur tlangpui duan niin Serchhip khaw chhunga Village Level Task Force te chu an duty na hmunah theuh hrui pawt-a duty leh tura beisei an ni a. Feh tur ten Task Force-ah phalna lehkha lak leh tur niin, feh hunbi erawh siam kher tawh loh tha tih a ni. Zingkar-a fehchhuak duhte chuan a hmain an Local Task Force-ah phalna laklawk a ngai bawk anga. Ruahmanna kimchang chu a hrana tihchhuah leh tur a ni ang.
He huna tarlan a nih danin Serchhip District-ah hian State danga tangkhang lo haw mi 440 awm tawhin heng zinga thenkhat chuan inkhunghranna hun an hmang zo tawh a, Serchhip District atanga RT-PCR Sample thawn tawh zingah 62 te chu result hriat ni tawhin nghah mek 65 awmin nimin khan 52 thawnthlak a ni leh bawk a. Tunhnaia Chennai atanga rawn haw khunghran hun hmang zo, mahni In lama awm tawhte tlawhchhuah leh mek niin an vaia RAT test leh vek tur niin mi 36 zinga 17 RAT result hriat tawh Non-Reactive vek an ni a, a bak la awm te pawh vawiin leh naktukah tlawh chhunzawm zel an ni ang. Serchhip District Police te pawhin March 12, 2020 atangin Sailulak leh Lungkawlh-ah rampawn atanga rawn lut tur vengin Duty an la in dah reng thu he hunah hian tarlan a ni bawk.

Comments

Chhiar Hlawhte