Latest News

Serchhip khawpui ah VLTF leh Police te ngawrh takin an Duty chhunzawm zel

Serchhip khawpui chhunga khauh zawka inkharkhip kalpui a nih hnuah VLTF hrang hrang te chuan Duty ngawrh taka kalpui mekin harsatna lutuk an tawhloh thu an sawi.
Mizoram sawrkarin tunkar Thawhlehni, June ni 9 atanga Total Lockdown a puan hnuah Serchhip khawpui chhungah Village Level Task Force (VLTF) te chuan Nilaini atang khan ngawrh takin Duty an nei mek a, VLTF hrang hrangte hian Hrui pawt-a Duty in khawlai-a lirthei kal vel an enfiah bakah phalna nei lova teichhuak an awm leh awmloh te an enfiah bawk a, an huamchhung atanga teichhuak turte hnenah phalna an pe nghal bawk a ni.
Serchhip khawpui chhunga sumdawnna hmun lian zual bialtu VLTF te chuan an huamchhung theuh ah mipuite tan Bazar-na hun leh Dawr inhawn theih hun te siamin Serchhip-IV leh Serchhip-VII te chuan eichawp zawrhna dawr hrang hrangte a inchhawk in an hawn tir a, New Serchhip North VLTF te chuan an huamchhunga eichawp zawrhna dawr te chu zing dar 6:00 atanga zing dar 10:00 thleng inhawn an phalsak thung a, VLTF hrang hrangte hian chawhmeh zawrhna tur hmun te siam lehin VLTF te hian chawhmeh leh thildang lei tura inkalpawh erawh an rem ti lo thung a ni.
Serchhip-a VLTF hrang hrangte chuan Lockdown kalpui mek chu mipui te pawhin an zawm tha thawkhat nia an hriat thu sawiin, sawrkar Pisa kai tura ruahman te chu dan an nih loh thu an sawi a, Lo lama Feh tur leh hnathawka chhuak turte pawh kal tir zel an nih thu sawiin, VLTF thenkhat chuan lirthei hmang-a ram kal turte pawh an dan loh thu an sawi hlawm a. Chutihrual chuan khawlai-a chhuak mi thenkhat erawh an awm ve zeuh zeuh thu an sawi bawk. Hei bakah hian Serchhip-V VLTF chuan an huamchhunga Khawvartui sem mek avangin mipui kalkhawm an tam thin thu sawiin, hei pawh hi tunkar chhung hian sem zawh tura ruahman a nih thu kan thudawnna chuan a sawi bawk.
Serchhip khawpui chhung Veng hrang hranga VLTF Duty te hi Serchhip Police te chuan a theih angin an thutchilh ve reng bawk a, heng bakah hian Police te hian Quarantine Centre hrang hranga Duty indahin, zan lamah khawpui chhung hmun hrang hrang fangkualin, zan lama pawn chhuah khapna ding mek chu a theih angin an kengkawh bawk a ni.

Comments

Popular News (Last 30 Days)