Khunghranna hmun sawn

State pawn atanga Serchhip District mi leh sa rawn haw, COVID-19 avanga Thenzawl a khunghran mek mi 14 te chu nimin khan North Vanlaiphai lama inkhunghrang tura sawn an ni a, tun dinhmun ah Serchhip District-ah inkhunghrang mi 373 an awm mek a ni.
Serchhip DC Office atanga thudawn danin Serchhip District mi leh sa, State pawn atanga rawn haw an awm reng avang leh heng mite hi a huhova rawn haw ni lo, mi 2/1 lek lek te leh hun laklawh taka rawn thleng thin te an nih avangin heng mite hi midang nena dahkhawm a rem loh bakah hmun hla zawka dah a buaithlak thin a. Hei vang hian Thenzawl Tourist Lodge-a khunghran mek mi 14 te chu nimin khan North Vanlaiphai lama inkhunghrang tura sawn chhoh an ni a, heng mite hi an Swab Sample lak tawh leh Negative vek niin ni 21 chhung inkhunghran an tul avanga an inkhunghran zawh hun la nghak mek te an ni.
Tun dinhmunah Serchhip District-ah hian mahni In lama inkhunghrang Mipa 47 leh Hmeichhia 27, an vaiin mi 74 awm mekin sawrkar hmunhma inkhunghranna hmun, Quarantine Facility Centre-a dah mipa 41 leh Hmeichhia 132, an vaiin mi 173 an awm mek a. Vantlang leh Koh-hran hmunhma a inkhunghrang, Community Quarantine Centre-ah Mipa 41 leh Hmeichhia 82, an vaiin mi 123 awm mekin Isolation-ah mi 3 an awm mek bawk a, Serchhip District-a inkhung-hrang zawng zawng hi mi 373 an awm mek a ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn