DLTF kutah thlai pein CM Relief Fund-ah sum hlan

Serchhip District chhunga Lungchhuan VLTF chuan Serchhip District chhung Quarantine Centre hrang hranga awm mekte tan nimin khan District Level Task Force on COVID-19 kutah chawhmeh leh thlai chi hrang hrang an hlan.
Lungchhuan VLTF te hmalakna in Lungchhuan khawtlang chuan an remchan ang thlai leh theirah te an thawh-khawm a, heng an thawhkhawm Antam, Maian, Chingit, Phuihnam, Thingthupui, Theihai, Theite, Hmarchate, Tumbu leh Japan-Zawngtah te chu Pik-up Truck hmanga rawn phurin Addl. DC, HD. Lalpekmawia kutah an hlan a, heng thilpek hlan tur hian VLTF aiawh hian VLTF Chairman, C. Vanlalvena leh YMA President, R. Lalbiakhlima te an rawn kal a ni.
Heng thilpek bakah hian CM Relief Fund-a a chhunluh turin Lungchhuan Branch YMA chuan Rs. 10,000/- an pe tel a, he sum hi Chief Minister aiawhin District Bawrhsap, Dr. Lalzirmawia Chhangte chuan a dawng a. Thilpek hlantu Lungchhuan Branch YMA President, R. Lalbiakhlima chuan YMA chu tanpuina dawng tur ni lovin, tanpui ngaite tanpuitu anih angin an theih ang tawk sumfai an hlan ve a ni tih a sawi a. Kumin YMA Day denchhenin chhungkaw 6 hnenah tanpuina sumfai an hlan thu a sawi bawk.
Bawrhsap chuan thilpek petute chungah lawmthu sawiin, an thilphalna chuan sawrkar hmalakna te pawh nasa taka a chhawk zangkhai thu a sawi bawk.

Comments

Chhiar Hlawhte