Serchhip-a COVID-19 hri kai hmuhchhuah mi 3 te enkawl dam vek an ni tawh

Serchhip District-a COVID-19 hri kai hmuhchhuah mi pathum (3) te chu an Sample enfiah hnuhnung berah hri an kai tawhlo tih finfiah a ni ta a. Amaherawh chu heng hri kai hmuhchhuah enkawl dam te hi mahni In lama haw rih lovin karleh lamah anmahni enkawlna hmun atanga chhuah tir theih beisei an ni.

Nimin a sawrkar thuchhuah siamin a tarlan danin Serchhip District-a COVID-19 hri kai hmuhchhuah hmasak ber, ZMC-a enkawl tura lak tak chu a Swab Sample endik nawn a nih hnuah hri a kai tawhlo tih finfiah niin damdawi In atanga chhuahtir (discharge) theih niin nimin khan damdawi In atanga chhuahtir a ni a. ZMC atang hian rawn chhuahtir mah se In lama inkhunghran zui rih aiah hun engemawti chhung chu Serchhip-a Dedicated Covid Health Centre-ah enkawl zui turin ruahmanna siam a ni.

Hetihlai hian a hnua hri kai hmuhchhuah midang 2, Serchhip-a enkawl mek te pawh niminpiah khan an Swab Sample thawn leh niin nimin-a an result chhuakah an negative ve ve bawk a. Anni pahnih hi Serchhip-a Dedicated Covid Health Centre-a enkawl lai niin chhuah tir rih lovin hun engemaw ti chhung enkawl chhunzawm an ni thung dawn a, karleh lamah chhuah tir theih beisei an nih thu Doctor te chuan an sawi.

Hetihlai hian hri leng avanga Serchhip District-a inkhunghrang mek mi 59 te chu nimin khan inkhunghranna hmun atanga chhuahtir an ni ve thung a, Serchhip CMO Office atanga thu kan dawn danin heng mite hi an Sample test result hriat a nih hnua chhuahtir an ni a, heng mite hi Govt Quarantine Centre 4- Govt. Serchhip College atangin mi 48, Tourist Lodge Serchhip atangin mi 4, P&E Rest House Bukpui atangin mi 3 leh Tourist Lodge Thenzawl atangin mi 3 leh In lama inkhung-hrang mi pakhat te an ni, an vai hian RT-PCR Test Negative vek tawh leh inkhunghran hun tur bituk hmang zo tawh te an ni.

Nimin-a Govt. Serchhip College atanga chhuak te hi a hmaa Sample laksak leh enfiah tawh niin, hemi tum hian an zingah hri kai an awm tak avanga an Sample lak nawn leh niin tunah chuan Serchhip atanga Sample thawn zawng zawng result hriat kim a ni tawh a ni.

Serchhip District-ah hri leng avanga in-khunghrang mi 42 an la awm mek a, heng te hi sawrkar hmunhmaa inkhung-hrang mi 34, Vantlang hmun-a inkhunghrang mi 6 leh Dedicated Covid Health Centre-a inkhung-hrang mi 2 te an ni.