International Day Against Drug Abuse And Illicit Trafficking pual :

RUIHHLO TELLO NUN DUHAWM ZAWK

- V. Lalnunthara (Mathara),
Founder President, Foundation For Drug-Free Mizoram

Ruihhlo Dona Ni - International Day Against Drug Abuse And Illicit Trafficking kan lo thlen hian Ruihhlo dona kawnga, kawng hrang hranga thawktu pawl te chibai ka buk a che u. Ruihhlo Dona Ni hi kum 1989 a\ang khan hman \an a lo ni tawh a. Kumin thupui hi 'Better Knowledge For Better Care' tih a ni a. Ruihhlo dona kawngah hian a kum telin, tawnhriat lo pung ta ah hian thlir dan thar te a rawn awm zel ta bawk a. Ruihhlo dona kawngah hian hriatna \ha leh zau zawk kan neih chuan a hmachhawn dan kan lo thiam zel dawn tihna pawh a ni thei ang chu.
Ruihhlo dona kawngah hian kan ramah sawrkar leh khawtlang kan \angrual \ha a, YMA in theih pa tawpin hma an la bawk a. An inpekna a fakawm hle a ni. Ka pian leh seilenna leh a chhehvel hi kan naupan lai a\anga 'Lawilo Dawrpui' an tih ang mai khan sualna hrang hrang in a chiahpiahna hmun anih avang hian tawnhriat mak pui pui hi a lo piang lo thei lova. Harsatna nasa taka ding mek kan Mizo unau leh tlangval te ngei han hmuh a, han kawm hian engemaw tak ruak chu an nunah a thleng \hin tih hi a pawmawm hle a ni. Awle, Mizoram-ah hian ruihhlo dona atana ke pen pawl hrang hrang an awm a, anni hma lo lak tawhna leh inpekna te hi a chhuanawm hle a, rah duhawm tak pawh kan hmu thin reng a ni.
April ni 1, 2019 khan 'Foundation For Drug-Free Mizoram' chu a lo piang ta a. He pawl hian kum khat hmel chauh a la hmu a, pawl naupang tak a ni. He pawl hian a tum ber chu kan \halaite hian Ruihhlo tello Nun Duhawm Zawk an neih theihna turin theihtawpin hma a la a ni. Kum khat chhung hian zirna In School leh Sunday School/Y.P Corps ah te kalin; zirlai naupang, hmabak eng tak nei te hnenah ruihhlo \hat loh zia zirtirna (awareness) pek an ni. He pawl hian kum khat chhungin School 23 leh Sunday School/Y.P Corps 2 tlawhin, naupang mi 5,000 chuang te hnenah zirtirna pek an ni. He hun hi a naupang ten \ha taka an ngaihthlak theih nan hlimawm tak si, a hlawk thei ang ber ni bawk siin hun hman \hin a ni a. Naupangten an ngaihsan tur mi chhuanawm tak tak ten an telpui \hin bawk a ni. Hun tawp ah zirlai naupang ten an duh thu ngei a thutlukna siam tirin, ruihhlo tello nun duhawm zawk nei tura intiam hi zaa 90 chuang an ni \hin a, a lawmawm hle a ni.
Zirna In 20 chuang kan tlawhna ah hian thu lawmawm tak leh he pawl min ti phur em em tu chu School kan tlawh zinga za a 80 chuan Ruihhlo \hat loh zia inzirtirna, Drug-Awareness Campaign hi an lo la nei ngai meuh lova. Hei hian zau zawka thawh a \ul zia a tilang a, he hun nelawm loh tak ata hi Pathian in hun \ha zawk min la pe ngei ang a, Aizawl chauh nilo Mizoram a zirna In te la tuam chhoh zel kan tum a. Foundation For Drug-Free Mizoram hi zirtirna pe tura sawm theih reng kan ni a, heti lama ram siam duh, kan awm ve ngeiin ka ring a. Rawn tel ve turin kan sawm che u a ni.
Awle, ram tan thawh tur a tam hle mai. Heng kan zirlai naupang tlawh tawh te an dinhmun enzui a, an intiam tawhna ah te an la ding nghet zel em? Chhungkua leh mimal harsatna tawh vanga \anpui zui mamawh tak te an awm? Thing phun a, ngaihsak zui a \ul ang chiah hian heng kan zirlai naupang, kan ram nghahfak te hi ngaihven zui a, Nun duhawm zawk an neih chhoh zel nana kaihruaitu leh \anpuitu hnai takah an awm reng tih hi an hriat a, an tana awm hi kan duhthusam a ni. 
Zirchianna hrang hrang a\anga a lan danin, khawvel huapin \halai kum 25 an tlin tawh hnu a ruihhlo hmansualna a lut \an ta hi an tlem hle a ni. Chuvangin, naupang leh rawlthar/tleirawl an nih chhoh lai a\anga ruihhlo ti lo tura zirtirna awmze nei leh intiamna an neih hi a mamawh takzet a ni. Ruihhlo Dona Ni kan lo thlen hian, ruihhlo dona atan kawng khat talin, inpekna thar nen kan tu kan faten 'Ruihhlo tello Nun Duhawm Zawk' an neih ngei theihna atan, ngaina takin \an i la thar leh teh ang u, tiin kan insawm a ni.

Comments

Chhiar Hlawhte