Kum kalta ah Drug License 21 cancel a ni

Sawrkar kum kalta, nikum April thla atanga kumin June thla thleng khan Serchhip District chhunga damdawi zawrh phalna nei mi 21 te License chu cancel niin tun dinhmunah Serchhip District-ah Drug License nei mi 165 an awm mek.
Asst. Director, Food & Drug Administration, Serchhip atanga thudawn danin Serchhip District chhunga Drug License nei te hi kum khat-ah vawi khat tal enfiah tura tih an nih angin a khat tawkin an dawr leh an thil zawrh te chu enfiah sak thin an ni a, kum kalta chhunga Drug Licence cancel sak mi 21 zinga a tam ber te hi mahni License neih hmang lova midang hman tir niin hei bakah hian License in phalna a pek zawm lova an zawrh theihloh zuar leh ruih theih damdawi dan lova lo zuarchhuak te an ni bawk. Nikum chhung vek khan Serchhip District chhunga Drug License Suspend mi pakhat (1) awmin License pek thar mi 13 an awm thung a ni.
Tun dinhmunah Serchhip District-ah hian Drug License nei mi 165 awm mekin heng zinga a tam ber hi Restricted Drug License nei niin mi 143 an ni a, General Retail Drug License nei mi 15 awmin Homeopathic Drug License nei mi 6 bakah Wholesale Drug License nei mi pakhat an awm bawk a ni.

Comments

Chhiar Hlawhte