Serchhip-ah Bawrhsap hovin (Incidence Response System-a mawhphurtu Officer te an thukhawm

Serchhip District Disaster Management Plan hnuaia chhiatna lo thleng lo hmachhawn tura ruat (Incidence Response System)-a mawhphurtu Officer (Responsible Officer) te chu nimin khan Serchhip-ah District Bawrhsap, Dr. Lalzirmawia Chhangte hovin an thukhawm.
He thutkhawm Serchhip DC Meeting Room-a neih ah hian District Bawrhsap leh District Responsible Officer, Dr. Lalzirmawia Chhangte chuan khuarel chhiatna hi kan thunun theilo tih sawiin, amaherawh chu chhiatna nasa lutuk a awm lohnan kan lo invengin kan lo inbuatsaih thei thung tih a sawi a. Tunhma chuan heng chhiatna hi kan Sepui ruah tuar deuh maia, a thlen fel hnuah chhawmdawlna leh inkhaichhuahna lam (Relief & Rehabilitation) kan thawk deuh mai thin a. Kum 2005 atang kha chuan India ramin Disaster Act neiin a lo thlen hma atanga lo inbuatsaih lawkna dan nen lam kan lo nei ta a, chu ruahmanna hnuaiah chuan Incidence Response System fel tak awmin mawh-phurhna hrang hrang kan insem ta a. Heng kan mawhphurhna te hi kan hriat tlana, ka intuai thar reng a tul a ni, tiin mawhphurhna nei Officer kalkhawm te chu a chah bawk.
He thutkhawm ah hian District chhunga chhiatna thleng palh a awma an mawhphurhna hrang hrang te inhrilh thar nan leh pawimawh dangte sawiho niin DM&R-a District Organiser, Vanlalduhi Ralte chuan Incidence Response System (IRS) hnathawh dan hrang hrang te a sawi a. Quick Response Team din a nih thu leh hman tangkai dan te, Office tinin Disaster Management Plan neih a tul dan te, chhiatna a lo thlena District Emergency Operation Centre tihnun leh kalpui dan te, District Disaster Management Plan anga chhiatna lo thleng lo hmachhawn dan tur tlangpuite zirho niin Department hrang hrang ten Development Plan an neihah te Disaster laka him tur zawnga ruahmanna (plan) neih a tul dan te sawiho a ni bawk.
Serchhip District Disaster Management Authority leh Incidence Response System hnuaiah hian District Disaster Response Force leh Quick Response Team awm mekin, a bik takin Quick Response Team te hi chhiatna thlenna hmuna rang taka tlan thleng thei tura ngaih leh buatsaih an ni a, Quick Response Team-ah hian mi 9 awmin heng mite hi chhiatna hmachhawn leh hna hlauhawm thawk tura training nei tawh leh an hmanraw mamawh zualpui DDMA ten an pek tawh te an ni a. Chhun zan zawma koh theih, zanlai-ah pawh an mutna bula an hmanruate daha, koh ruala kal nghal thei tura inralring reng te an ni. Mipuiten kan mamawhna thil chhiatna; leimin, inchim, thlipuiin in a tihchhiat, tuilian vanga chhiatna, accident, leh chetsualna thil dangah biak leh koh theih reng an ni.

Comments

Chhiar Hlawhte