Bazar-a chawhmeh zuar turin ruahmanna siam duh

Serchhip Bazar building-a Chawhmeh zuar thintute chuan an mipui ten chawhmeh zawrh te thianghlim zawka an lei theih nan leh an harsatna sutkian a nih theih nan sawrkar in Bazar hmunah chawhmeh zawrhna siam sak thei se an duh thu an sawi.

Sawrkar laipui in inkharkhip a kalpui mekah Bazar Building te hawn theih ala nih loh avangin Serchhip Bazar building-a chawhmeh zuartute chu tunah hian an thutna ngaiah thu thei lovin an awm mek a, hemi chungchangah hian Serchhip District Bawrhsap chuan tunhnai khan thupek tichhuakin VLTF tin chu mahni Veng theuhah chawhmeh zawrhna siam tur leh Tuizemsen Kawn leh Town Hall kawt-ah chawhmeh zawrh phal a ni bawk tih a tarlan angin, niminpiah atang khan heng hmun hnih ah hian chawhmeh zuar te hi thuin chawhmeh hi an zuar a ni.

Heng hmun-a chawhmeh zuar-a thu te chuan khawlai-a chawhmeh an zawrh avangin ni sa leh ruahsur avanga harsatna a tawh thu sawiin,  hei bakah hian kawngpui kamah leh awmna hmun mumal pawh nei lova inzuar an nih avangin an chawhmeh zawrh ang te pawh a thianghlim zo lo ang tih an hlauh thu an sawi a, hei vang hian sawrkar in ruahmanna tha zawk siam sakin, Bazar hmun ah hian chawhmeh an zawrh theih dan tur ruahman sak thei se an duh thu an sawi a. Tuna an chawhmeh zawrhna hmunah pawh hian Police te an Duty ve thin thu sawiin, hetiang hian Bazar hmunah pawh hian Police te duty in ruahmanna tha tak nen chawhmeh hi an zawrh theih an beisei thu an sawi bawk a ni.

Serchhip Bazar-a chawhmeh zuar thin te chuan inkharkhipna kalpui mek a nih avanga chawhmeh kharchhawn tur a van thu pawh an sawi a, District chhung khaw hrang hrang atanga chawhmeh an lakluh thin pawh kumdang anga a tam loh avangin harsatna an tawh mek thu leh tualchhung tharchhuah a remchang ang ang an zawrh thu an sawi bawk.