Sairang-ah mitthi halralna hmun tur, Gas based Crematorium hawn a ni

Manpower Development Board Vice Chairman, Zothantluanga MLA chuan nimin khan Sairang a mitthi halralna hmun, Gas based Crematorium chu a hawng.

Urban Development & Poverty Alleviation Department hmalaknaa sak Sairang-a Gas based Crematorium hi Special Plan Assistance (SPA 2013-2014) leh NEDP 2017-19 scheme hnuaia sum ruahman hmanga sak niin cheng nuai 120 sengin a hmun hma te buatsaih a nih bakah khawl te bunfel a ni a. A sak hna hi February, 2015-ah tanin November, 2018-ah zawhfel a ni. A hmunah hian Electric Line a luh loh avangin sak zawn a nih hnuah pawh hun rei tak enchhin theihloh in a awm a, nikum khan enchhinna neiin tunah chuan hman theiha hawn a ni ta a ni.

Crematorium hawnna hunah hian bialtu MLA ni bawk, Zothantluanga chuan he mitthi halna hmun hmang tangkai tur ber, Aizawl-a cheng Gorkhali te chu Mizote nen inpeizawna chengho, lawmna leh harsatna te intawm thin an nih thu sawiin, Crematorium changtlung tak Sawrkarin a peihfel chu an tan mai bakah Mizoram tan pawh hun lokal zel tur ngaihtuahin thil tangkai tak a nih a beisei thu a sawi a. Hnam tin leh sakhaw tinin mitthi sawngbawl chu an rilru damna leh an lungawina tur ang thlapin an ti thin tih pawh sawiin, Crematorium chuan mipui mamawh, a bik takin Gorkhali leh hnamdang ten hun rei tak atanga an lo mamawh chu a phuhru dawn a ni, a ti.

Sairang-a Crematorium-ah hian LPG Crematorium Furnace Chamber, a ruala Commercial LPG cylinder 30 hmang tur bun a ni a, khawl hunna in chu RCC building a sak niin a dung ft. 12.40 leh a vang ft. 6.50 a ni a, meikhu chhuahna tur Chimney ft. 40 a sang a awm bawk a. Inbualna leh inthiarna hmun bakah Permanent works – Approach Road siam te, lirthei dahna tur hmun laihzawl te, Retaining Wall leh Culvert te siam a ni bawk a. Heng zawng zawng hi SPA atanga nuai 100 ruahman atanga sak a ni a. Kum 2017-18 khan NEDP sum nuai 20 ruahman leh niin he sum hmang hian Caretaker/Attendant Quarters sak a nih bakah Diesel Generator set(10 KVA- 3 Phase) bun a ni bawk.

Gas hmanga mitthi halna, Crematorium-ah hian ruang pakhat halral nan Commercial LPG bur 2 vel hmanral tura chhut niin a khawl hi Gujarat lam atanga lak luh a ni a. Hmarchhak bial-ah LPG hmanga inhalna Crematorium pahnihna niin a hmasa ber chu kum 2012 khan Guwahati-ah hawn a lo ni tawh a. Nimin a Sairang-a Crematorium hawnna huna tel, Mizoram Gorkha Youth Association (Central) hruaitute chuan Crematorium chu hun rei tak atanga an lo buaipui ve tawh a nih thu sawiin, hawn a ni ta chu lawmawm an tih thu an sawi bawk.