Lirnghing vangin la buai

Tunhnaia lirnghing nasa avangin Mizoram khawchhak lam chuan harsatna an la tawk mek zel a, mi tam tak mahni In leh lo-a riak mumal ngam lovin an awm mek.

Tunkar Thawhtanni-a Mizoram-a lirnghing kal zel nia hriatah nimin zing thleng khan Mizoram khawchhak lamah chuan lirnghing hriat tur la awmin he lirnghing hnuah hian mihring hriat theih chinah tum 17 zet lir-nghing hi hriat tur a awm tawh a, nizan hmasa dar 12:45 vel khan Myanmar ramchhung, Champhai atanga khawchhak lam KM 75 velah leichhungril KM 100 atangin 4.2 magnitude-a nain lir a nghing a, hei bakah hian dar 1:14 vel khan Mizoram leh Myanmar inrina bul, Mizo-ram chhung lam, Champhai atanga chhim lam KM 21 velah, lei chhungril KM 136 atangin 4.5 magnitude in lir a nghing bawk a. Geological Survey of India mithiam te chuan heng lirnghingte hi June ni 22, 2020 zing-a 5.8 magnitude-a na lir nging chhunzawmna nia an ngaih thu leh ni 10 chhung vel chu nghin chhunzawm thei dinhmunah a ding niin an sawi bawk a ni.

Hetianga Tuipuiral khaw hrang hrangte lirnghing in a sawi avang hian mi tam tak chu mahni In ah pawh riak tha ngam lovin an awm mek a, hei vang hian nizan hmasa khan Vaphai Branch YMA te chu khawchhung hmun hrang hrangah tlaivarin mahni In-a riak ngamlo te hi an veng a, Zawlsei leh Leithum khawtlang pawhin mahni In-a riak ngamlo te tan hian nimin khan mual-ah riahkhawmna tur an sa a ni.

Hetihlai hian Salvation Army, Indian Eastern Territorial Hqrs. pawhin mahni In leh lo-a riak ngamlote riahna tur puan In sem turin nimin khan Aizawl chhuahsanin Tuipuiral hi an pan bawk a. Sawrkar mi pawimawh te leh lei-chhung lam chanchin zirmi thahnem takin Tuipuiral khua te hi panin thil awmdan an thlithlai mek bawk a ni.