Saiha-ah TrueNat Quattro Laboratory bunna tur enfiah

Social Welfare Minister, Dr. K. Beichhua hovin nimin khan Siaha District Hospital Complex-a TrueNat Quattro Laboratory bunna tura hmun hma chu sawrkar tirh Expert Team te nen enfiah a ni.
Mizoram sawrkar in a tirh Expert Team ten TrueNat Laboratory bunna tur an enfiahna ah hian Dr.K.Beichhua chuan TrueNat khawl chu COVID-19 hrik chauh ni lovin, TB, HIV, Typhoid leh natna chi hrang hrang 16 lai test nan a hman theih a ni dawn tih sawiin, Natna hrik hmuhchhuah theih loh avanga sum tam tak senga hmunpui zawk kan pan thin te pawh he khawl bunfel a nih hunah chuan a ziaawm dawn tih a sawi bawk.
Expert Team-ah hian RIPANS, PUC leh Civil Hospital, Lunglei-a mithiam te telin TrueNat Quattro khawl bunna tur hmun hma te an enfiah hnuah an hmuhdan report kimchang chu Health & Family Welfare Minister hnena an thehlut leh dawn a, TrueNat Laboratory hi Siaha-ah bunfel thuai anih tur thu he huna tel Social Welfare Minister leh Expert Team te hian an sawi bawk a ni.
TrueNAT Quattro khawl hi TB hrik enna khawl niin tlem siam danglam hret a ni hnuah Indian Council of Medical Research (ICMR) in kumin April thla a COVID-19 hri test nan hman tlaka a pawm chauh a ni a. TrueNat khawl hi khai sawn theih niin, Biosafety Level 3/2- Laboratory ni kherlo, Laboratory changkang lutuk lovah pawh hman theih a ni a. He khawl hi a len leh tet a zirín Single Channel leh Four Channel (Quattro Machine) a awm a. Quattro machine hian, nikhatah sample 40 vel a test thei dawn a ni. He khawl vil tur hian thawktu tam leh Laboratory changtlung tak pawh a ngai lem lo a ni. Covid-19 hripui hi lo reh pawh nise hman tangkai zui zel theih a ni dawn a, he khawl hi mihring natna chi hrang hrang-16 lai check nan a hmanzui theih dawn a ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn